Халид Бешлиќ важеше за најголемиот пејач на народна музика во Босна и Херцеговина, а токму така беше и испратен по неговата смрт. Во негова чест, вчера се организираа низа собири во повеќе од 150 градови ширум светот.
Почнувајќи од неговото Сараево – каде пред Вечниот оган се собраа повеќе од 20.000 луѓе кои во еден глас ги пееја хитовите на Халид – тешко е да се најде место во Босна и Херцеговина кое вчера не му оддаде почит.
Сè започна напладне во родното место на Халид, Кнежина, а во 17 часот следеа собири во Тузла, Зеница, Горажде, Бања Лука, Бијељина, Приедор, Сански Мост, Орашје, Бихаќ, но и во многу други места низ државата.
Синот на Бешлиќ, Дино, на собирот во Сараево се заблагодари на „Сараево, но и на целиот свет“ за ваквото испраќање на неговиот татко, а навистина – градови од целиот свет се „одзваа“ на повикот на Енис Бешлагиќ, за легендарниот пејач да биде испратен онака како што заслужува.
Во 17 часот, „Romanija“, „Miljacka“, „U meni jesen je“, „Pamtit ću te“, како и низа негови хитови што сите ги знаат збор по збор, се пееја и низ целиот регион.
Белград во солзи ја пееше славната „Beograđanka“, во Загреб масата заеднички ја пееше „Čardak“, а и Љубљана му пееше на Халид кај арената „Стожице“. Во Подгорица за Халид беа пуштени бели балони.
Во Виена за Халид се собраа илјадници, пееше и Грац, Цирих, Минхен, Дортмунд, Берлин, Париз, како и Луксембург.
Далечните Сиднеј и Мелбурн нешто порано од другите започнаа со песна и опростување од легендата, а снимките што се споделуваат на социјалните мрежи покажуваат како насобраните во Сиднеј ја пеат „Prvi poljubac“.
Сите овие собири – повеќе од 150 – сведочат за големината на човекот кој нè напушти, а посебно се истакнува тоа што покрај песните поради кои никогаш нема да биде заборавен, сите зборуваат и за неговата добрина и хуманост.
Безброј се анегдотите и приказните од оние што ги споделуваат своите искуства со Халид – како им помогнал, било финансиски, со совет или со песна – а секоја од тие приказни сведочи за тоа колку пред сè бил добар човек.
„Биди како Халид“ е пораката што изминативе денови се шири по социјалните мрежи, а како што рече Адемир Кеновиќ на прошталниот собир во Сараево: „Чудото што нè собира овде со ваква сила е добар човек – добриот човек Халид. Халид не може да исчезне. Тој е пример какви треба да бидеме и како светот може да се поправи со широчината на неговата добрина“.
