На вредноста на возилото влијаат бројни фактори – од состојбата и редовното одржување, до староста и бројот на изминати километри.

Според истражувањето на онлајн платформата „Carwow“, токму километражата е еден од најважните показатели кога е вистинското време за продажба или замена на автомобилот.

Кога автомобилот првпат значително ја губи вредноста

Анализата на податоците за половни автомобили продадени меѓу 2022 и 2024 година покажала дека вредноста нагло паѓа веќе по 15.000 изминати километри.

Во тој момент, цената се намалува во просек за дури 22%.

Следниот голем пад се случува по 30.000 километри, кога автомобилот губи дополнителни 24% од својата вредност.

На подолг рок, кога таблата ќе покаже 100.000 километри, автомобилот во просек вреди и до 64% помалку отколку кога бил нов.

По 150.000 километри – уште еден сериозен пад

Истражувањето покажува дека следниот значаен пад од околу 19% настапува кога автомобилот ќе ја надмине границата од 150.000 километри.

Експертите советуваат сопствениците внимателно да ја следат километражата и да ја испланираат продажбата пред возилото да ги достигне овие клучни точки.

„Нашите податоци покажуваат колку е важно внимателно следење на километражата. Сопствениците кои сакаат да го продадат својот автомобил мораат да реагираат брзо, бидејќи одложувањето може да доведе до значителен пад на вредноста – особено кога автомобилот ќе ја надмине границата од 15.000 километри“, објаснува Иан Рид од компанијата „Carwow“.

Тој додава дека, иако постојат многу фактори кои влијаат врз цената – километражата останува најпресудниот, без разлика на моделот или марката на возилото.