Прага ги забранува електричните тротинети, приклучувајќи се кон Мадрид и Париз. Чешката престолнина ќе воведе забрана за електричните тротинети од наредната година, со што станува уште еден европски град што ја ограничува оваа, кај туристите многу популарна форма на превоз.
Градските советници во понеделникот усвоија нова мерка со која се менуваат правилата за споделен превоз и се регулира каде велосипедите – било обични или електрични – смеат да се паркираат во Прага. Сепак, споделените електрични тротинети се изоставени од новите правила, што практично значи дека нивниот пристап ќе биде оневозможен од јануари.
„Крајот на електричните тротинети е усвоен!“, објави Зденјек Хржиб, претседател на Пиратската партија и заменик-градоначалник задолжен за сообраќај, на социјалната мрежа „X“.
„Воведуваме јасни правила кои ќе го ослободат јавниот простор од хаотичниот сообраќај на тротинетите, кои во центарот на градот често се користеа повеќе како туристичка атракција отколку како превозно средство и создаваа неред на тротоарите и во пешачките зони“, додаде Хржиб.
Оваа градска иницијатива доаѓа по низа локални обиди да се намали бројот на електрични тротинети кои со голема брзина минуваа низ Прага. Веќе беше воведена забрана во најпрометниот дел од центарот на градот, каде што жителите се жалеа на безбедносни ризици.
И други европски градови ги заострија правилата кога станува збор за електричните тротинети – Париз и Мадрид веќе целосно ги забранија.
Компанијата „Lime“, која со години нуди електрични тротинети и велосипеди во Прага, ги отфрли тврдењата дека тротинетите имаат негативно влијание врз локалното население.
Вацлав Петер, директор на „Lime“ за Чешка и Унгарија, изјави за „Euronews Next“ дека компанијата е „разочарана“ од одлуката на градските советници.
Според неговите зборови, тротинетите на оваа фирма „им овозможија на илјадници луѓе во Прага флексибилен, одржлив и достапен начин на движење низ градот“, а забраната претставува „драстичен чекор“.
„Сега ќе се фокусираме на проширување на услугите со електрични велосипеди во Прага и на блиска соработка со градот за воведување јасни, кон иднината насочени правила за споделената микромобилност“, додаде Петер.
