[ФОТО/ВИДЕО] Мускулестите жени од Токио ги поместуваат границите: Несекојдневните перформанси привлекуваат посетители од целиот свет

„Muscle Girls“ - фитнес бар каде работат исклучиво жени, стана хит кај странските туристи и домашните посетители поради предизвикувањето на традиционалните јапонски концепти за женската убавина.

„Во Јапонија, луѓето обично ги сметаат жените со мали гради, тенок грб и витки нозе за привлечни. Сепак, гостите што доаѓаат во „Muscle Girls“, претпочитаат посилни раце и нозе. Сè уште се сеќавам колку ми порасна самодовербата кога сфатив дека е во ред да бидам токму онаква каква сум сега“, рече 38-годишната менаџерка на барот, Хитоми „Хари“ Харигае.

„Muscle Girls“, кој се отворил во средината на 2020 година, станал вирален на социјалните мрежи и привлекува околу 100 посетители дневно, од кои повеќето се странски туристи.

Цената од 6.000 јени (околу 40 долари) за 80 минути вклучува протеински шејк и пијалак по избор, додека персоналот настапува, покажува бодибилдинг пози, служи пијалаци и изведува разни други атрактивни активности.

Јапонија има најголем процент на неисхранети возрасни жени меѓу развиените земји, околу 9 отсто според податоците од Организацијата за економска соработка и развој (ОЕЦД), што е речиси пет пати повеќе отколку во САД и Германија.

Комитет од лекари и академици кои ја проучуваат дебелината оваа година предупреди дека конвенцијата што ја изедначува слабоста со убавината предизвикува неисхранетост и други здравствени проблеми кај јапонските жени и заслужува внимание.

Хари и нејзините колешки од „Muscle Girls“ сега го гледаат барот како место каде што можат да им се спротивстават на тие норми и да ја редефинираат убавината.

„Јас мислам дека ова е заедница каде што луѓето кои се малку необични можат да бидат заедно и мислам дека и другите мислат така. Барот е место што сите го цениме“, рече Хари.