Одржувањето на соодветна хидратација во текот на зимските месеци може да биде изненадувачки тешко, но експертите истакнуваат дека е исто толку важно – ако не и поважно – отколку во лето.

Јадира Сантијаго Бануелос, клинички доцент и практичар по семејна медицина на Универзитетот Пердју, истакнала дека хидратацијата игра клучна улога во сè, од здравјето на кожата до имунитетот кога температурите паѓаат, пишува „Euronews“.

„Кога сме добро хидрирани одвнатре и нашата кожа е подобро хидрирана, што помага при сувост. Исто така, помага за подмачкување на зглобовите, што е важно за нас кога, на пример, чистиме снег“, изјавила Бануелос.

Хидратацијата, исто така, придонесува за подобар имунитет за време на сезоната на настинки и грип.

„Помага во одржувањето на влажен слој на слузокожата што спречува навлегување на вируси и бактерии во текот на зимата“, додала таа.

Зошто зимската дехидратација лесно се занемарува?

Бануелос нагласила дека луѓето често го потценуваат ризикот од дехидратација во текот на постудените месеци.

„Обично не ја поврзуваме зимата со дехидратација, па затоа во тие месеци активно не размислуваме дали пиеме доволно вода“, објаснила таа.

Исто така, природното чувство на жед слабее.

„Нашите рецептори за жед всушност се намалуваат за околу 40 отсто“, рекла Бануелос, што значи дека луѓето можеби веќе се дехидрирани кога ќе почувствуваат жед.

Студеното време, исто така, придонесува и на помалку очигледни начини. Сувиот воздух ја влече влагата од кожата, луѓето уринираат почесто во зима, а потењето сè уште се случува – иако е помалку забележливо.

„Сè уште се потиме, но често не го забележуваме бидејќи потта испарува побрзо на студ“, додала таа.

Кои се здравствените ризици од дехидратација?

Според Бануелос, дехидратацијата може да предизвика низа симптоми, во зависност од сериозноста, вклучувајќи вртоглавица, сува кожа, испукани усни, чувство на слабост и мозочна магла како и замор.

Долгорочната дехидратација може да биде многу посериозна.

„Може да го зголеми ризикот од посериозни последици, вклучувајќи проблеми со бубрезите, како што се откажување на бубрезите и зголемен ризик од камења во бубрезите“, истакнала таа.

Колку вода всушност ви е потребна?

Често цитираната препорака за пиење осум чаши вода дневно можеби не е доволна за секого.

„Мажите обично имаат потреба од повеќе – околу 13 чаши или 104 унци (околу три литри) вода дневно. Жените, во просек, имаат потреба од околу девет чаши или 72 унци (околу два литра) дневно“, објаснила Бануелос.

Потребите може да се зголемат за време на бременост или доење, кога на жените може да им треба количина вода слична на онаа што им е потребна на мажите.