Првите камери ќе бидат поставени на автопатот A-2, главната сообраќајница меѓу Мадрид и Алкала де Енарес, кога на почетокот на 2026 година ќе биде отворена новата Bus-VAO лента (лента за возила со повеќе патници). Од тој момент, секој што ќе биде фатен како сам вози во означената лента автоматски ќе биде казнет.

Поттик за Шпанците да го делат превозот

Најновиот потег на „DGT“ е дел од поширока стратегија за решавање на еден од најголемите сообраќајни проблеми во земјата – преголемиот број возила во кои седи само возачот. Според официјалните податоци, во најголемите градови за време на најголемиот метеж дури 85 проценти од автомобилите имаат само еден патник. Директорот за сообраќај, Пере Наваро, на оваа тема зборува веќе со месеци.

„Кога во секој автомобил би имале по две лица, би имале двојно помалку возила, двојно помала потрошувачка на гориво и двојно помали емисии. Нашата инфраструктура не е проектирана за 50 милиони луѓе – нејзините ограничувања стануваат очигледни“, изјави тој претходно оваа година.

Пораката е јасна: шпанските патишта се преоптоварени, а делењето на возењето повеќе не е прашање на избор. Таа филозофија сега преминува во практика. Новата лента за возила со повеќе патници на A-2 ќе биде целосно автоматски надгледувана преку комбинација од читачи на регистарски таблички и камери за детекција на бројот на патници.

За разлика од старите VAO ленти, повеќе нема да има полицајци кои проверуваат – технологијата ја презема контролата.

Како ќе функционира системот?

За разлика од класичните издвоени ленти, новата VAO лента на A-2 ќе биде динамична. Левата лента за време на „шпицот“ ќе се претвора во лента за возила со повеќе патници, а надвор од гужвите ќе се враќа во нормален режим.

Таа ќе биде резервирана за возила со најмалку две лица, јавен превоз, мотоцикли и служби за итни интервенции. Интересно е што дури ни возилата без емисии (со сина еколошка ознака) нема да имаат привилегии – и тие ќе мора да имаат најмалку двајца патници за да ја користат VAO лентата.

„DGT“ наведува дека лентата ќе биде јасно означена со LED маркери, нови сообраќајни знаци и динамични панели, со инвестиција од 3,9 милиони евра.

Според првите визуелизации, таа би можела дури и да биде обоена во црвено за веднаш да биде препознатлива. Иако официјалната технологија сè уште не е претставена, се очекува системот да користи термални камери, слични на оние што веќе функционираат на францускиот автопат A-83 меѓу Нант и Бордо.

Овие камери ги мерат топлинските траги во возилото за да го утврдат бројот на патници.

Што ги очекува шпанските возачи понатаму?

„DGT“ јасно порачува дека ова е само почеток. Доколку пилот-проектот на приодот кон Мадрид се покаже како успешен, радари за контрола на пополнетоста би можеле да се прошират и на други важни сообраќајници низ Шпанија. Агенцијата ги опишува како „флексибилно и евтино решение“ што лесно се приспособува на различни типови патишта.

Истовремено, владата подготвува нов Кралски декрет со кој на локалните самоуправи ќе им се овозможи да го ограничат влезот во Зоните со ниски емисии (ZBE) не само врз основа на еколошката ознака на возилото, туку и според бројот на патници во него, пишува „Euroweeklynews“.