Додека порано колекционерите бараа исклучиво луксузни лимузини, денес во фокус се обични градски автомобили и хечбек модели кои некогаш сите сме ги возеле. Анализата на експертите од компаниите „AutoWeek“ и „Classic Data“ покажува дека некои модели ја удвоиле својата вредност за само неколку години.

Кои автомобили носат најголема заработка?

Легендарниот „Peugeot 205 GTI“ ја предводи оваа листа со пораст на цената од неверојатни 120 проценти во споредба со периодот од пред неколку години. Во 2019 година чинел околу девет илјади евра, додека денес за зачуван примерок се бараат речиси 19.000 евра. Љубителите на автомобили бараат автентично искуство на возење без модерна електроника, што на овие стари машини нагло им ја зголемува цената во огласите.

Познатиот „Golf II GTI“ со 16 вентили исто така бележи огромен раст и сега се продава за просечни 16.500 евра. Дури и малиот „Renault Twingo“ од првата генерација станува баран класик бидејќи неговата цена од две илјади порасна на 3.500 евра. Неговиот шарм и едноставност привлекуваат нова генерација купувачи кои сакаат нешто сосема поинакво од модерните и прекомплицирани возила.

Спортските модели стануваат реткост

„Opel Kadett GSi“ и „Honda Civic VTEC“ станаа вистински раритети кои е речиси невозможно да се најдат во фабричка состојба. „Kadett GSi“ денес достигнува цена од 17.500 евра, што е речиси 50 проценти повеќе отколку пред неколку години. Овие модели со децении беа занемарувани, но нивната издржлива механика и спортско минато денес вредат многу повеќе отколку што некој може да замисли.

„Ford Escort XR3i“ и „Citroen BX“ со 16 вентили исто така го следат овој тренд со стабилен раст на вредноста. Сопствениците кои ги зачувале овие автомобили во оригинална состојба, без непотребни преправки, денес можат сериозно да заработат. Дури и јапонските модели како „Toyota Corolla“ од раните осумдесетти стануваат цел на сериозни колекционери поради својата легендарна доверливост и реткост на патиштата.

Зошто обичните автомобили стануваат скапи?

Главната причина за овој голем пораст на цените е фактот дека повеќето од овие автомобили низ годините се уништени или лошо одржувани. Да се пронајде зачуван примерок со оригинална боја и ентериер стана невозможна мисија за многу купувачи. Токму таа реткост го диктира пазарот и ги турка цените во небо, претворајќи ги некогашните народни автомобили во вистински инвестиции на четири тркала.

Малите автомобили како „Lancia Y10“ исто така бележат раст од речиси 80 проценти бидејќи нудат полуксузен пристап кон градското возење од минатиот век. Ако во гаража имате некој од овие модели, можеби „седите“ на мало богатство кое во иднина само ќе расте. Пазарот на класични автомобили трајно се промени и сега е вистинско време да проверите што се крие под вашата церада.