Токму таквиот начин на истражување станува клучен тренд во урбаниот туризам, бидејќи овозможува побавно, поавтентично и поодржливо патување, без потреба од автомобил или јавен превоз на секој чекор.

Повеќе од 90 отсто од жителите потврдиле: Сеул е еден од ретките мегаградови во кој пешачењето е наједноставниот начин на движење

Најновото истражување на порталот „Тајм Аут“ за 2026 година откри кои градови во светот се најпријатни за движење пеш, а резултатите се темелат на мислењето на самите жители. Во анкетата учествувале илјадници луѓе од различни градови, кои оценувале колку нивното секојдневие е приспособено за пешачење, односно колку местата низ градот им се достапни без превоз.

На самиот врв на листата се најде Сеул, главниот град на Јужна Кореја. Повеќе од 90 отсто од неговите жители оцениле дека градот е исклучително погоден за пешаци, што го смести на првото место на глобалната листа.

Достапноста на содржини на мали растојанија и континуираните вложувања во инфраструктурата се клучот на успехот

Ваков резултат произлегува од внимателно планираната урбана структура, во која секојдневните содржини се достапни на релативно мали растојанија. Во бројни населби, продавниците, рестораните, културните институции и јавните служби се наоѓаат на само неколку минути пешачење, со што се намалува потребата од користење автомобил или некој друг облик на превоз.

Градот притоа континуирано вложувал во проширување на пешачките зони, квалитетот на тротоарите и безбедноста во сообраќајот, што дополнително ги поттикнува жителите и посетителите да се движат пеш.

Европските метрополи се во врвот на листата

Високо на листата се наоѓаат и европските метрополи кои со години вложуваат во урбана инфраструктура приспособена за пешаци.

Меѓу нив се Единбург, Копенхаген, Осло и Стокхолм, градови познати по уредените улици, безбедноста и достапноста на содржините на мали растојанија. Тука се и Париз и Сингапур, кои исто така нудат одличен баланс меѓу голем град и лесно движење.