„Една чашка дневно не го штити здравјето, тврдат научниците: Веќе два пијалаци на ден го зголемуваат ризикот од смрт и заболувања

Ова го покажува нова студија објавена во „Journal of Studies on Alcohol and Drugs“, соопшти Факултетот за јавно здравје при Универзитетот Колумбија.

„Оваа студија дава најсеопфатни проценки за САД во однос на ризиците од смртност и болести што можат да се припишат на алкохолот во текот на животот, покажувајќи дека дури и умереното ниво на консумација го зголемува ризикот од предвремена смрт и инвалидитет“, истакнала коавторката на студијата, Кетрин М. Кис, докторка на науки и професор по епидемиологија на Факултетот за јавно здравје.

Не е забележан заштитен ефект од алкохолот, дури и при ниски нивоа на консумирање!

Наодите покажуваат дека ризикот од смрт поврзана со алкохол е 1 од 25 за луѓе кои консумираат просечно 14 пијалаци неделно. Наспроти тоа, консумирањето до 7 пијалаци неделно било поврзано само со минимално зголемен ризик за неколку здравствени состојби.

„Дури и ниските нивоа на консумирање алкохол носат здравствени ризици. И тој ризик продолжува да расте колку повеќе пие едно лице“, рекол првиот автор на студијата, Кевин Шилд, вонреден професор на Универзитетот во Торонто и виш научник кој го раководи Центарот за соработка за зависност и ментално здравје при Светската здравствена организација и Панамериканската здравствена организација.

Истражувачите од САД и Канада имале за цел да утврдат како животните навики поврзани со консумирањето алкохол влијаат на ризикот од болест и смрт кај Американците. Откако медицинските експерти разгледале повеќе од 7.200 научни трудови за болести и повреди предизвикани од алкохолот за да го утврдат нивото на ризик за секоја состојба, истражувачите ги примениле тие ризици во огромна национална база на податоци за здравствени податоци. Потоа користеле статистичко моделирање за да утврдат како различните нивоа на консумирање влијаат на долгорочните здравствени исходи.

Студијата нуди поконкретни упатства од новите американски препораки за исхрана (U.S. Dietary Guidelines), кои моментално им советуваат на граѓаните да „ги ограничат алкохолни пијалаци“, без прецизирање која количина алкохол може да се смета за безбедна.

Претходните препораки препорачуваа максимум два алкохолни пијалаци дневно за мажи и еден за жени. Дефиницијата за „еден пијалак“ варира во зависност од видот на пијалакот, но најчесто вклучува 355 мл пиво, 150 мл вино или 44 мл жесток пијалак, иако ова може да варира во зависност од концентрацијата на алкохол.

Иако новите американски препораки ја содржат корисната порака дека „малку е најдобро“, тие не нудат квантитативна рамка, наведуваат авторите. Токму затоа оваа студија е дизајнирана да обезбеди таква рамка за целиот спектар на консумирање.

Се покажа дека просечното консумирање од два пијалаци дневно, што од општа гледна точка често се меша со умерена консумирање е поврзано со значително зголемен ризик од предвремена смрт предизвикана од алкохол.

Покрај ризикот од смртност, истражувачите анализирале и како навиките за пиење влијаат врз хроничните и акутните состојби поврзани со алкохолот, како што се ракот – вклучувајќи го ракот на хранопроводот, усната шуплина и дојката – кардиоваскуларните заболувања, заболувањата на црниот дроб и повредите.

Студијата ја побива широко распространетата заблуда дека алкохолот може да го заштити здравјето. Истражувачите не забележале значаен заштитен ефект на алкохолот врз општото здравје на кое било ниво на консумирање. Тие напомнуваат дека при ниски нивоа на внес на алкохол, тој може да биде поврзан со намален ризик од исхемична срцева болест и мозочен удар. Но, кога се разгледува целиот спектар на здравствени исходи, вклучувајќи го ракот и другите хронични заболувања, потенцијалните придобивки ги надминуваат ризиците, дури и со консумирање од 7 пијалаци неделно.

Статистичкото моделирање што се користело во студиите за да се утврдат здравствените ризици се базира на „најдобрите можни податоци“, соопшти истражувачкиот тим. Сепак, тие предупредиле дека не треба да се претпоставува дека индивидуалниот здравствен ризик на секоја личност е ист како што е прикажано во студијата, бидејќи зависи од други фактори како што се начинот на живот, генетиката, навиките за пиење и други лични избори.

Истражувачите го процениле ризикот за сите здравствени состојби за кои е познато дека се каузално поврзани со алкохолот, а потоа ги комбинирале тие проценки за да го утврдат вкупниот здравствен ризик. Сепак, постојано се појавуваат нови истражувања кои го поврзуваат алкохолот со дополнителни здравствени состојби, како што е ракот на панкреас.

„Разбирањето на овие врски и колку алкохолот придонесува за овие ризици е област која продолжува да бара дополнителни истражувања“, нагласиле Кетрин М. Кис и Кевин Шилд.