Основачот на „Амазон“ и еден од најбогатите луѓе во светот, во интервју за „Фајненшл тајмс“, рече дека верува оти вештачката интелигенција ќе донесе голем број нови можности и ќе започне, како што вели, „повеќе златни доба“ во различни индустрии. „Луѓето кои заклучуваат дека сите работни места едноставно ќе исчезнат - мислам дека грешат“, изјавил Безос.

Неговиот оптимизам е поврзан со неговата нова компанија „Prometheus“, лабораторијата за вештачка интелигенција вредна 41 милијарда долари што ја лансираше минатиот ноември со Викрам Баџаџ, поранешен извршен директор на „Гугл“. Тоа е првата компанија што Безос ја води откако се повлече од функцијата извршен директор на „Амазон“ во 2021 година.

„Prometheus“ сака да развие систем што го нарекува „вештачки општ инженер“, т.е. вештачка интелигенција способна да ги разбира физичките процеси и да помага во дизајнот, развојот и производството. Целта е значително да се скратат циклусите на развој и да се намали потребата од скапи физички прототипови.

„Сакаме да им овозможиме на инженерите ширум светот да ја работат својата работа подобро, побрзо и да ги донесат производите на пазарот што е можно поскоро“, изјавил Безос.

Безос верува дека вештачката интелигенција ќе игра клучна улога во речиси секоја област со која се занимава денес, од вселенските летови и роботиката до логистиката, „cloud computing“ и истражувањето на долговечноста.

„Сè на што работам денес е некако поврзано со вештачката интелигенција“, истакнал тој.

Тој се осврнал на потенцијалот на неговата вселенска компанија, „Blue Origin“, за која верува дека би можела многу да има корист од технологиите што ги развива „Prometheus“.

„Се наоѓаме во средината на неколку златни доба. Секако кога станува збор за вештачката интелигенција, но и во областа на вселената и биотехнологијата. Во следните десет години ќе видиме цела низа неверојатни откритија“, изјавил Безос.

Спротивен став од дел од индустријата за вештачка интелигенција

Бројни експерти и лидери на компании за вештачка интелигенција постојано предупредуваат на можни сериозни последици од автоматизацијата.

Меѓу нив е и извршниот директор на „Anthropic“, Дарио Амодеи, кој постојано предупредува дека напредните системи за вештачка интелигенција би можеле да загрозат голем број работни места. Во неодамна објавен есеј, тој предложил уште повисоки даноци на капитална добивка за финансирање на универзален основен приход во случај на значително нарушување на пазарот на трудот.

Безос верува дека ќе се случи токму спротивното. „Темелот на секое цивилизациско богатство се пронајдоците. Пред шест илјади години некој го измислил плугот и сите станавме побогати“, изјавил тој.

Според него, нема да има недостиг од работни места, туку од работници, бидејќи, вели тој, вештачката интелигенција ќе отвори сосема нови области на економска активност.

Компанија од 41 милијарда долари

„Prometheus“ досега собра 12 милијарди долари од инвеститори, вклучувајќи ги „JPMorgan Chase“, „BlackRock“ и самиот Безос, со што вкупната проценка на компанијата достигна 41 милијарда долари. За да ги собере податоците потребни за обука на системот, Прометеј планира да инвестира во традиционални производствени и инженерски компании преку посебна холдинг компанија за која Безос и Баџаџ се стремат да соберат до 100 милијарди долари.

Компанијата веќе ангажираше стотици експерти од различни инженерски дисциплини и привлече вработени од конкурентски компании за вештачка интелигенција, вклучувајќи ги „OpenAI“, „xAI“ и „Meta“.

Исто така, имаше разни анегдоти за необични методи на регрутирање. Така, неодамна се шпекулираше дека извршниот директор на „Мeta“, Марк Закерберг, лично им носел домашна супа на потенцијалните кандидати за да ги привлече во компанијата. „Ако сакаат да им зготвам супа, ќе им зготвам. Само што никој досега не ме прашал“, се пошегувал Безос.