Меѓутоа, опсежна анализа на сообраќајните податоци и едноставната математика покажуваат дека зголемувањето на брзината на автопат од 120 на 140 км/ч. носи занемарлива заштеда на време, а истовремено драстично ја зголемува потрошувачката на гориво и го скратува досегот на електричните возила.

Опсежното истражување на Универзитетот во Минесота, кое опфатило дури 120 милиони возења, открило дека повеќе од 43 отсто од анализираните патувања вклучуваат најмалку еден случај на пречекорување на брзината. Возачите во просек поминуваат околу 12 отсто од вкупното време на возење над дозволеното ограничување, под претпоставка дека на тој начин заштедуваат време. Сепак, конечните податоци го уриваат тој мит: просечната дневна заштеда добиена со пречекорување на брзината изнесува само 54 секунди.

Зошто 20 км/ч. повеќе носат само четири секунди?

Разликата меѓу 120 и 140 км/ч. звучи значајно на хартија, но во пракса носи минимална корист. Шпанскиот професор по математика Хозе Анхел Мурсија пресметал дека оваа разлика во брзината му носи на возачот заштеда од само околу четири секунди на изминат километар.

Причината лежи во самата математичка природа на брзината и времето. Со секој дополнителен километар на час, маргиналната добивка во заштедата на време станува сè помала. На пример, преминувањето од 50 на 70 км/ч. носи далеку поголема временска разлика отколку преминувањето од 120 на 140 км/ч. Практично, за на делница од автопат долга 50 километри да заштедите помалку од три минути, би морале цело време да возите со 140 км/ч. без никакво забавување или застој во сообраќајот.

Цената на неколку заштедени секунди

Од друга страна, цената на тие неколку заштедени секунди е исклучително висока. Со зголемувањето на брзината, аеродинамичниот отпор на воздухот не расте линеарно, туку квадратно. Тоа значи дека моторот мора да вложи значително повеќе енергија само за да го совлада отпорот и да ја одржи брзината од 140 км/ч. во споредба со 120 км/ч.

Кај автомобилите со мотори со внатрешно согорување, тоа се претвора во прогресивен и забележлив скок на потрошувачката на бензин или дизел. Кај електричните возила ефектот е уште поизразен – возењето со повисоки брзини драстично го забрзува празнењето на батеријата и го намалува вкупниот досег, што често ги принудува возачите порано или подолго да запираат на полначи, со што секоја почетна заштеда на време целосно се поништува.

Покрај финансискиот и енергетскиот трошок, математиката потсетува и на безбедносниот аспект: при брзина од 140 км/ч., патот на сопирање е значително подолг, а времето за реакција на неочекувани пречки драстично пократко. Кога вистинската добивка се мери во секунди, дополнителниот ризик и поголемата потрошувачка ја губат секоја рационална смисла.