Веројатно барем еднаш сте слушнале дека не треба да пиете вода од пластично шише за еднократна употреба кое подолго време стоело во загреан автомобил, но можеби не сте слушнале зошто. Еве го објаснувањето.

Овие шишиња за вода најчесто се произведуваат од „PET“ (полиетилен терефталат), издржлив синтетички полимер кој се смета за безбеден за употреба. Сепак, истражувањата укажуваат дека постојат неколку причини поради кои би требало да се избегнува консумирањето вода која стоела во загреано „PET“ шише.

Изложеност на хемикалии

Кога пластичните садови се оставаат на високи температури или на директна сончева светлина, одредени хемикалии поврзани со пластиката полесно можат да преминат во храната и пијалаците.

Фталатите – синтетички хемикалии што се користат за одредени пластични материјали – при изложување на топлина можат полесно да се ослободуваат од пластичната амбалажа. Тие, заедно со други хемикалии што се користат во производството на пластика, можат да влијаат врз природните хормонални процеси во организмот и потенцијално да предизвикаат здравствени проблеми.

Според „Harvard Medicine“, истражувањата спроведени врз клеточни култури, морски организми и животински модели покажуваат дека микропластиката може да предизвика оксидативни оштетувања, оштетувања на ДНК и промени во активноста на гените, кои се познати фактори на ризик поврзани со развојот на рак.

Се наведуваат и неколку истражувања спроведени врз глувци, кои покажале дека микропластиката може да им наштети и на репродуктивните органи, да предизвика создавање лузни на јајниците, да го намали бројот и квалитетот на сперматозоидите и да доведе до метаболички нарушувања кај потомството.

Размножување на бактерии

Уште една причина за претпазливост е фактот што топлите услови се идеални за размножување на бактерии. Тие можат да се развиваат во шишињата поради влагата, топлината и хранливите материи што доаѓаат од плунката или од остатоците од пијалакот, а нивното размножување може да започне за многу кратко време.

Консумирањето таква вода може да предизвика желудочни и дигестивни тегоби, а во одредени случаи и посериозни здравствени проблеми.

Побезбедни алтернативи

Здравствените експерти и научниците препорачуваат водата во текот на денот да се носи во шишиња од нерѓосувачки челик или стакло.

Сепак, треба да се има предвид дека и овие шишиња мора редовно и темелно да се мијат. Во спротивно, и во нив можат да се развијат бактерии и мувла.