Богатството на основачот на компанијата „Dell Technologies“, Мајкл Дел, во понеделникот се зголеми за дури 4,3 милијарди долари, по силното закрепнување на технолошките акции на берзите. Со овој скок, Дел повторно го престигна извршниот директор на компанијата „Meta“, Марк Закерберг, на листата на најбогатите луѓе во светот и го зазеде петтото место на планетата.

Според проценките, нето-богатството на Мајкл Дел сега изнесува околу 241,3 милијарди долари. До овој раст дошло откако акциите на неговата компанија пораснале за два отсто, по обновувањето на довербата на инвеститорите во технолошкиот сектор, кој претходната недела беше под притисок поради загриженоста околу огромните трошоци за развој на вештачката интелигенција. Дополнителен поттик за богатството на Дел му донел и неговиот значителен сопственички удел во гигантот за производство на чипови „Broadcom“, чии акции во понеделникот зајакнале за 2,4 отсто.

Од друга страна, акциите на „Meta“ забележале пад од околу 1,1 отсто, со што личното богатство на Закерберг се намалило на приближно 240,7 милијарди долари, па тој го загубил петтото место на листата на светските милијардери.

Неверојатен скок на крилјата на вештачката интелигенција

Мајкл Дел бележи исклучителни резултати во изминатиот период, пред сè благодарение на експлозивниот раст на побарувачката за наменски сервери и хардвер за дата центрите за вештачка интелигенција, кои ги произведува компанијата основана уште во осумдесеттите години на минатиот век.

Кога претходно оваа година беше објавена престижната листа „Forbes 400“, богатството на Дел се проценуваше на 141 милијарда долари. Тоа значи дека за само неколку месеци тој го зголемил својот имот за повеќе од неверојатни 100 милијарди долари. Во текот на септември, Дел накратко беше и вториот најбогат човек во светот, пред пазарните осцилации и стравот од прегревање на пазарот привремено да ја намалат вредноста на акциите.

Сите погледи се насочени кон Закерберг и финансискиот извештај

Инвеститорите и берзанските аналитичари со големо внимание ја очекуваат среда, кога е закажано објавувањето на финансиските резултати на компанијата „Meta“ за третиот квартал.

Акциите на сопственикот на Фејсбук и Инстаграм забележаа пад во јули, откако извештајот за вториот квартал покажа значително намалување на готовинскиот тек поради огромните инвестиции во технологијата за вештачка интелигенција. Сепак, ситуацијата би можела да се промени, бидејќи компанијата во септември лансираше нов моќен асистент со вештачка интелигенција, кој во првите недели забележа милиони преземања и, според брзината на растот, ги надмина почетните фази на алатките како што се „ChatGPT“ и „Claude“.