Оваа импресивна зграда со 12 ката и висина од околу 40 метри, која се наоѓа на само 20 минути со воз од Централната станица во Амстердам, е дизајнирана од познатиот архитект Вилфрид ван Винден.

Надворешноста на хотелот е всушност комбинација од речиси 70 традиционални куќи карактеристични за овој регион, обоени во четири различни нијанси на зелена и сина боја. Меѓу нив, се издвојува сина куќа инспирирана од познатата слика на Клод Моне од 1871 година.

Оваа уникатна архитектура го претвори овој хотел во едно од најфотографираните места на планетата.

Комбинација од индустриска историја и врвен луксуз: Соби инспирирани од фабриките за какао

Сите 160 соби и апартмани вешто ја комбинираат модерната удобност со елементи од локалното историско наследство, инспирирани од животот на работниците и традиционалните фабрики од овој регион, како што се поранешните фабрики за производство на какао и бисквити.

Покрај автентичниот надворешен дух од минатото, зградата нуди и најсовремени содржини. Гостите имаат на располагање модерен „Wellness & Spa“ центар со затворен базен со загреана вода, финска сауна, турска парна бања и сензорни тушеви.

Во рамките на хотелот работи ресторанот „Puur Saen“, кој подготвува локални кулинарски специјалитети, а има и прекрасна тераса сместена веднаш на работ на водата.

За оние со „подлабок џеб“, некои луксузни апартмани нудат врвно уживање со приватна сауна или хидромасажна када.

Колку чини преноќувањето во ова архитектонско чудо?

Цените за сместување моментално се околу 265 евра по ноќ за двајца возрасни, според податоците од платформата за резервации.

Покрај цената за сместување, задолжителниот градски данок е 7,87 евра по лице/ноќ за возрасни, додека за помлади гости до 16 години е 3,93 евра.

Исто така, при регистрација на рецепција (чекирање), потребен е депозит од 50 евра, кој служи како гаранција за користење на мини-барот или какви било непредвидени трошоци за време на престојот.