Планирано е да се произведат само 1980 примероци – бројка која симболично ја оддава почит на годината на лансирање на оригиналниот модел. Првите 1000 возила се веќе резервирани.

„Продадовме околу половина од целата серија на глобално ниво, што значи дека тековните резервации се за испораки во 2028 година“, изјави менаџерот на проектот, Мишел Грожан, за Autocar. „Иако сме распродадени до 2028, уште половина од серијата е достапна за резервација.“

Грожан додаде дека производството на првите прототипови е веќе започнато, а првите испораки до купувачите се очекуваат веќе следната година. Најскапиот автомобил на "Renault" досега привлече широк спектар на купувачи.

„Профилот на клиентите е навистина разновиден, но заедничка им е страста кон екстремни и спортски автомобили. Некои веќе поседуваат оригинален "R5 Turbo" и сакаат да ја заокружат колекцијата со новиот модел“, објаснува тој. „Други пак во своите гаражи имаат модели од "Alpine", "Ferrari" или "Porsche", но овој автомобил го гледаат како нешто различно, егзотично.“

Производството на "3E" треба да заврши до 2029 година. Грожан додава дека моментално нема планови за слични лимитирани изданија, но не ја исклучува можноста и други модели да добијат вакво славеничко третирање.

Брутални перформанси и напредна технологија

Иако "5 Turbo 3E" го наследува дизајнот од новиот електричен "Renault 5", под каросеријата е сосема нова приказна. Користи специјално развиена платформа, каросерија по мерка и пар електромотори сместени директно во тркалата. Резултат: забрзување од 0 до 100 km/h за помалку од 3.5 секунди, до 193 km/h за под 9 секунди, а максималната брзина на патека изнесува 270 km/h.

Моторите во тркалата испорачуваат моќ директно на задните тркала, со што се постигнува попрецизна контрола и значителна заштеда на маса и простор. Оваа технологија, според "Autocar", ја испорачува британскиот специјалист "Protean Electric", и воедно ја елиминира потребата од електронски диференцијал.

Енергијата доаѓа од батерија со капацитет од 70 kWh, позиционирана за оптимална агилност и со „спектакуларни“ можности за дрифт, тврдат од "Renault". Возилото дури има и специјален „Drift“ мод, како и вертикална рачна сопирачка инспирирана од рели автомобили. Досегот изнесува до 402 km, но при целосна експлоатација на патека батеријата трае 15 до 20 минути.

Дизајн што ги поместува границите

Платформата е целосно алуминиумска и ја разви "Alpine" – спортската подмарка на "Renault". Каросеријата е направена од лесни материјали по мерка. Од серискиот "Renault 5" се преземени само ретровизорите, рачките од вратите и задните светла. Благодарение на карбон-композитната структура, тежината на возилото изнесува околу 1450 килограми.

Автомобилот е дизајниран да изгледа како суперспортски модел, со јасни референци кон оригиналниот "5 Turbo" и "5 Turbo 2". Аеродинамични браници, преден сплитер и голем отвор на хаубата овозможуваат максимална потисна сила. Новиот модел е за 158 mm подолг, 256 mm поширок и 118 mm повисок од стандардниот "Renault 5".

Внатрешноста носи школкасти седишта обложени со "Alcantara", рачно ткаена ткаенина во каро-дезен на арматурната табла и безбедносни појаси. Присутни се и многу карбонски елементи за намалување на масата. Дигиталната кабина се состои од 10.1-инчен дисплеј со инструменти и 10.25-инчен инфотејнмент екран. Возачкото седиште ќе има ексклузивна обвивка во посебна боја.