Сега научниците можеби имаат одговор, барем кога станува збор за машкото тело. Истражувачите од Кинеската академија на науките откриле каков тип машка фигура жените го сметаат за најпривлечен. А нивните откритија би можеле да ги задоволат сите оние со таканаречен изглед на „dad bod“ – малку млитаво тело и со малку вишок килограми, типично за мажи кои престанале редовно да вежбаат откако станале родители.

Според истражувањето, најатрактивниот индекс на телесна маса (BMI) за мажите е помеѓу 23 и 27.

На горниот крај од тој опсег, BMI всушност веќе се смета за прекумерна тежина, според класификацијата на Британската национална здравствена служба (NHS).

„Масното ткиво може да биде важно бидејќи е обратно пропорционално на нивото на тестостерон во крвта и затоа е подобар показател за „квалитетот“ на потенцијалниот партнер“, напишаа истражувачите.

Низ историјата, идеалите за женското тело драстично се менувале – од облини како Мерилин Монро во 1950-тите, до екстремно слабиот изглед од 1990-тите. Меѓутоа, машкото тело досега не било во фокусот на слични истражувања.

„Физичката привлечност кај мажите е значително помалку проучувана“, се вели во студијата предводена од Фан Сја, објавена во списанието „Personality and Individual Differences“.

За да го пронајдат одговорот, научниците собрале 283 испитаници од Кина, Литванија и Велика Британија. Им биле прикажани 15 црно-бели слики од машки тела со различни вредности на BMI – од 20,1 до 33,7 – додека лицата им биле заматени. Задачата на испитаниците била да ја оценат привлечноста на телото на скала од 1 (најмалку привлечно) до 9 (најпривлечно).

Резултатите покажале:

Во Кина – најатрактивниот BMI изнесувал 23,4

Во Литванија – 23,0

Во Велика Британија – 26,6.

За споредба, NHS смета дека BMI помеѓу 18,5 и 24,9 е „здрав“, додека BMI од 25 до 29,9 е во категоријата „прекумерна тежина“.

Иако постојат значителни разлики во стапките на дебелина меѓу овие земји, научниците не пронашле големи културни разлики во преференциите. Можеби ќе помислите дека луѓето претпочитаат послабо тело, но резултатите покажале дека и мажите и жените претпочитаат BMI помеѓу 23 и 27.

„Веројатно затоа што од еволутивна гледна точка е корисно двата пола да имаат слично чувство на привлечност во сопствената популација“, заклучува студијата.

Ова е добра вест за мажите со неколку вишок килограми. Сепак, претходните истражувања покажале дека мажите сè уште претпочитаат послаби женски фигури.

„Жените се чувствителни на телесната тежина на начин што е во согласност со еволутивните очекувања. Спротивно на тоа, претходните студии покажуваат дека мажите ги сметаат жените кои се послаби од еволутивниот оптимум за попривлечни“, наведуваат истражувачите.