Швајцарија е една од најскапите земји во Европа, а воедно е прогласена и за најдобра во светот. Истовремено, наводно, секој 7-ми човек таму е милионер.

Но, ова не значи дека Швајцарците имаат целосна финансиска слобода, туку можеби повеќе се работи за нивното добро управување со парите.

Имено, анкетата на „Deloitte“ - „Pulse of Switzerland“ минатата година го сврте вниманието на фактот дека растечката инфлација остава трага и на швајцарските паричници, што се одразува на однесувањето на потрошувачите.

Прво „отпаѓаат“ рестораните

Речиси 60% од испитаниците ги намалуваат своите трошоци и се откажуваат од работи што не им се неопходни, при што повеќе од половина јадат и пијат помалку надвор – дури 52% од Швајцарците прво се откажуваат од одење во ресторани и излегување во клубови и барови.

Втората мерка се – патувања и одмори – 40% од испитаниците рекле дека ги намалиле трошоците за одмори, патувања и слободно време. Исто така, ист број од нив го намалуваат купувањето облека и нови работи.

На крајот, луѓето се обидуваат да заштедат не само на „поголеми предмети“ и луксузи, туку и на обични намирници. Повеќе од една третина (34%) од испитаниците од анкетата на „Deloitte“ рекле дека ги намалиле трошоците за храна. За да ги намалат трошоците, 51% од нив обрнуваат поголемо внимание на специјалните понуди и промоции, 44% од испитаниците се префрлаат на поевтини производи, а 37% ги менуваат добавувачите (на пр. продавници или брендови) за да го оптимизираат трошењето.

Помал број од испитаниците свесно штеделе на образование (10%), јавен превоз (14%) и телекомуникации (16%), што укажува дека луѓето јасно ги сметаат овие области за поважни.

Штедење на неочекувани трошоци

Сепак, Швајцарците не штедат (само) за да преживеат – 79% од Швајцарците веруваат дека штедењето е важно и тоа првенствено за неочекувани трошоци, според анкета спроведена од компанијата „Baloise“ во соработка со институтот за истражување на пазарот „YouGov“, спроведена оваа година.

Меѓутоа, се покажало дека само 47% од испитаниците рекле дека успеале да заштедат нешто во изминатите шест месеци. Учесниците биле на возраст помеѓу 15 и 79 години.

Дури 71% штедат за да бидат подготвени за непредвидени трошоци, но причините за штедење се менуваат во различни фази од животот, на пример, значително повеќе луѓе под 30 години (19%) штедат за сопствен дом од која било друга возрасна група.

Оваа анкета, исто така, покажала дека повеќе од половина од населението на Швајцарија во моментов е задоволно од својата финансиска состојба. Главните причини се: доволни до добри приходи (33%), финансиски резерви или средства (23%) и отсуство на акутни грижи (20%). Сепак, кога биле прашани за иднината, финансиската благосостојба паѓа на 44%, што одразува одреден степен на скептицизам, а главните причини за ова се неизвесноста околу пензискиот систем (24%), несоодветната пензија (20%) и општата загриженост за иднината (17%).