„Освоив 190 милиони на лото и живеам во пекол: Еве што ми направија сопругот и родителите откако ги добив тие проклети пари!“

Во искрен разговор за британските медиуми, Џилијан призна дека нејзиниот свет целосно се променил — но не онака како што очекувала. Наместо благодарност и заедништво, добила завист, незадоволство и барања кои никогаш не престанале.

Откако ја освоила добивката, таа великодушно им поделила околу 20 милиони фунти на членовите на семејството. Прво ги исплатила долговите кои со години ги притискале нејзиниот татко и брат, вклучувајќи скоро 900.000 фунти од неуспешни семејни бизниси. Потоа купила стан за родителите кои претходно живееле во камп-приколка, надевајќи се дека со тоа ќе им обезбеди сигурност.

Но, само девет месеци по тоа што се обидела да им го олесни животот, се соочила со првото сериозно разочарување. Родителите ја притискале на братот да му обезбеди дополнителни 800.000 фунти за нов бизнис. Таа се согласила — но благодарност никогаш не дочекала. Напротив, братот наскоро го прекинал контактот со неа и организирал сопствена венчавка на која таа не била ниту поканета.

„Ги заборавија корените“, рекла Џилијан, разочарана што парите, наместо да спојуваат, често разделуваат.

Нејзината мајка подоцна тврдела дека ќерката „не им дала колку што зборува дека им дала“, додека Џилијан смета дека проблемот е многу подлабок — парите ги разбудиле алчноста, натпреварувањето и лошите намери.

„Се фалат со тоа колку имаат. Мислат дека парите зборуваат наместо нив. А всушност, сето тоа е многу грдо“, признала таа.

За жал, пукнатините не се појавиле само во односите со родителите и братот. Само 15 месеци по добивката, Џилијан и тогашниот сопруг Едријан одлучиле да се разведат. Тој јавно признал дека огромната сума пари станала извор на стрес и дека притисокот за управување со тоа богатство го уништил нивниот брак.

Додека Џилијан по разводот формирала ново семејство, Едријан немал среќа. И покрај тоа што четири пати пробувал заеднички живот со различни жени, не успеал да ги сочува врските. Сите го оставале веднаш штом ќе се вселеле во луксузната вила, која на крајот ја продал за многу помала цена од онаа за која ја купил.

Меѓутоа, нивните несреќи не завршиле тука. Сообраќајната несреќа што ја доживеал нивниот син Камерон им причинила голем стрес. Во септември 2021, овој тинејџер, тогаш 13-годишник, удрил со својот квад во автомобилот на својата сестра Ејми (17) на нивниот приватен имот. Камерон паднал во кома, но за среќа закрепнал.

Експертите велат дека ова е честа ситуација. Советничката Емили Ирвин истакнува дека големата добивка не носи само луксуз и сигурност — туку и комплицирани семејни односи, повредена суета, очекувања и незадоволства кои се појавуваат одеднаш. Затоа советува добитниците да се консултираат со професионалци кои ќе им помогнат да постават граници и да го зачуваат менталниот мир.

Џилијан денес живее повлечено во Шкотска, свесна дека освоила богатство, но загубила нешто многу повредно — мирот во семејството.