Витаминот Ц е есенцијален нутриент кој игра многу важни улоги за здравјето. Тој е моќен антиоксиданс, неопходен за создавање колаген и за функцијата на имунолошкиот систем, а истовремено ја подобрува способноста на телото да апсорбира железо.
Многу пијалаци содржат импресивни количини витамин Ц и можат да бидат практичен начин за зголемување на неговиот дневен внес.
Сок од грејпфрут
Сокот од грејпфрут е силен извор на витамин Ц, а една чаша содржи повеќе од 100 отсто од дневните потреби.
Овој сок е богат и со витамин А, како и со моќни растителни соединенија, вклучувајќи каротеноиди и флавоноиди како нарингин, кои му помагаат на телото во справување со оксидативниот стрес и воспалението.
Истражувањата покажуваат дека пиењето сок од грејпфрут може да ги зголеми нивото на витамин Ц и нарингин во крвта, а воедно да ја зајакне вкупната способност на крвта да ги неутрализира штетните слободни радикали.
Сок од домат
Иако свежите домати содржат солидна доза витамин Ц, концентрираните форми, како што е сокот од домат, содржат значително повеќе по порција.
Домат од околу 100 грама обезбедува нешто помалку од 20 отсто од препорачаниот дневен внес, додека една чаша сок од домат содржи дури 136 отсто од препорачаниот внес на витамин Ц.
Покрај витамин Ц, сокот од домат е добар извор на калиум и ликопен – растителен пигмент со силни антиоксидативни и противвоспалителни својства.
Сок од ананас
Една чаша сок од ананас содржи повеќе од 27 отсто од дневните потреби за витамин Ц, а обезбедува и други есенцијални витамини и минерали, како фолати и витамин Б6.
Сокот од ананас содржи и антиоксидативни растителни соединенија, како флавоноиди и бромелаин – ензим со изразени противвоспалителни својства.
Смути
Смутито може да се консумира како здрав меѓуоброк или лесен оброк кога немате многу време.
Смути направено од една чаша замрзнати јагоди и една чаша грчки јогурт покрива повеќе од 68 отсто од дневните потреби за витамин Ц и обезбедува околу 25 грама протеини кои даваат чувство на ситост.
Содржината на витамин Ц во смутито може дополнително да се зголеми со комбинирање на јагодите со друго овошје или зеленчук богат со витамин Ц, како киви или кељ.
Вода со лимон
Доколку сакате да ги избегнете калориите и високиот внес на јаглехидрати од соковите, а сепак да уживате во пијалак богат со витамин Ц, пробајте вода со лимон.
Една лажица свежо исцеден сок од лимон додадена во вода може да обезбеди значајна доза витамин Ц во исхраната. Водата со сок од еден лимон содржи повеќе од 20 отсто од дневните потреби за витамин Ц.
