Извори во петокот изјавиле за „TMZ“ дека 32-годишниот Ник бил под надзор на психијатар поради ментална болест и дека неговото однесување станало „алармантно“ во неделите што претходеле на смртоносниот напад врз неговите родители.

Околу еден месец пред убиствата, лекарите наводно ја промениле терапијата на Ник, по што тој, според тврдењата, „го изгубил разумот“. Како што се наведува, тие биле во процес на приспособување на лековите со цел да го стабилизираат кога се случила трагедијата.

Има шизофренија?

Ник неодамна, според наводите, бил на лекување во скапа рехабилитациска установа во Лос Анџелес која е специјализирана за ментални болести и зависности, а извор тврди дека злоупотребата на супстанции дополнително ја влошила неговата шизофренија.

Шизофренијата е хронично нарушување на мозокот кое се карактеризира со заблуди, халуцинации, дезорганизиран говор, тешкотии во размислувањето и недостаток на мотивација, наведува Американската психијатриска асоцијација.

Наводно се очекува Ник да се изјасни дека не е виновен поради непресметливост.

Бил на рехабилитација 20 пати

Ник, кој живеел во гостинската куќа на своите родители во Брентвуд, има историја на насилство и зависност од дрога. Бил на рехабилитација речиси 20 пати и повремено бил бездомник.

Во неделата попладне, Роб и Мишел биле пронајдени мртви во својот дом. Ги пронашла нивната ќерка Роми Рајнер. Изворите тврдат дека се здобиле со смртоносни повреди.

Канцеларијата на судскиот патолог на округот Лос Анџелес подоцна потврди дека двојката починала од „повеќекратни повреди предизвикани од дејство на остар предмет“, а смртта била оквалификувана како убиство.

Му се заканува смртна казна

Ник бил уапсен во неделата навечер во близина на Експозишн парк во центарот на Лос Анџелес, откако наводно оставил крвави траги во еден хотел во Санта Моника.

Првично бил задржан во затворот Паркер Центер, а потоа бил префрлен во казнено-поправниот центар Твин Тауерс, каде што се наоѓа без можност за кауција.

Во вторникот бил обвинет по две точки за убиство од прв степен, со отежнувачка околност на повеќекратно убиство. На Ник му се заканува максимална казна доживотен затвор без можност за условен отпуст или смртна казна.

Првото појавување пред судот го имал во средата. Со разбушавена коса, тој останал смирен и сериозен за време на целото рочиште, гледајќи право пред себе. Бил врзан со лисици на рацете и нозете и носел заштитна облека против самоповредување.

За време на појавувањето изговорил само три збора за да му каже на судијата: „Да, чесен суде“, потврдувајќи дека е сигурен дека сака да се откаже од правото на брзо сослушување. По краткото рочиште, Џексон им изјавил на новинарите пред судот дека неговиот клиент формално ќе биде обвинет на 7 јануари. Исто така ја замолил јавноста да не донесува прерани заклучоци, опишувајќи го случајот како „многу, многу сложен и сериозен“.

Чудно однесување на божиќна забава?

Ноќта пред убиствата, Ник им се придружил на Роб и Мишел на божиќна забава во домот на Конан О’Брајан. Наводно, двојката не сакала да го остави сам дома бидејќи неговото екстремно и стресно однесување се засилило и во последните недели станало уште позагрижувачко.

Ник на забавата се однесувал бизарно и на гостите им било непријатно, што довело до расправија со родителите. За време на настанот, Роб наводно им рекол на некои пријатели дека е „преплашен“ дека Ник еден ден би можел да го „повреди“.

Ник, според наводите, отсекогаш имал „непријателски“ и „нестабилен“ однос со семејството, но неговиот „гнев“ бил главно „насочен кон родителите“.

Еден инсајдер изјавил за „Page Six“ дека Ник „навистина му замерувал на татка си“ и дека „се мразел себеси затоа што не бил подеднакво талентиран, продуктивен или сакан“ како наградуваниот актер и режисер. Друг извор го опишал Ник како „разгалено“ и „неблагодарно“ непо-бебе, дете на славни родители. Лице кое го познавало Ник во детството го опишало како „интензивен“ и „егоцентричен“, наведувајќи дека имал „неисцрпна енергија и сериозни проблеми во однесувањето“.