Главните причини се сè поголемото прифаќање на вештачката интелигенција и затворањето на филијалите, поради што банките забрзано се обидуваат да остварат заштеди и да префрлат поголем дел од работењето на интернет.

Црни прогнози на „Morgan Stanley“

Според прогнозата на банката „Morgan Stanley“, индустријата до 2030 година би можела да го намали бројот на вработени за 10 проценти. Со оглед на тоа што 35 анализирани банки заедно вработуваат околу 2,12 милиони луѓе, тоа би значело отпуштање на околу 212.000 работници.

Намалувањата најверојатно ќе се случат во одделите за таканаречени централни услуги, што вклучува административни работи, како и позиции во управувањето со ризик и усогласеност. „Многу банки наведуваат зголемување на ефикасноста што произлегува од вештачката интелигенција и понатамошната дигитализација во износ од 30 проценти“, порачуваат од „Morgan Stanley“.

Трка по заштеди

Европските банки се под силен притисок од инвеститорите да пронајдат нови начини за намалување на трошоците и зголемување на повратот на капиталот, кој континуирано заостанува зад оној на американските конкуренти. Вештачката интелигенција им нуди можност да го подобрат односот меѓу трошоците и приходите – клучна мерка за ефикасност што ја следат инвеститорите – откако претходните кругови на кратење трошоци се исцрпија.

Банките веќе почнаа да ја наведуваат вештачката интелигенција како двигател на реструктурирањето. Холандската банка „ABN Amro“ во ноември објави дека до 2028 година ќе укине околу една петтина од своите вработени, додека извршниот директор на „Société Générale“, Славомир Крупа, во март предупреди дека „ништо не е свето“ во неговата кампања за намалување на трошоците.

Потенцијалот на вештачката интелигенција

Експлозивниот раст на вештачката интелигенција поттикна стравувања од масовни губења на работни места во бројни индустрии. Нејзиниот потенцијал да го преобликува европското банкарство го истакнуваат и аналитичарите на „UBS“, која веќе почна да ја користи технологијата за претворање на своите аналитичари во аватари што им испраќаат видеосодржини на клиентите.

Џејсон Непиер, раководител на истражувањата за европските банки во „UBS“, изјави: „Веќе гледаме промени во индустриите на ревизија, право и советување, но банките сè уште не постигнуваат подобрена ефикасност. Трошковните бази се големи… а овие нови моќни алатки допрва треба целосно да се имплементираат“.

Тој додаде: „Оние на кои сè уште им е потребно уверување дека вештачката интелигенција значајно ќе ги промени финансиските услуги, треба да поминат повеќе време истражувајќи ги алатките што веќе се достапни“. „UBS“ неодамна ги испрати своите 250 највисоки раководители на Универзитетот Оксфорд на самит за вештачка интелигенција.

Повик на претпазливост

Сепак, додека банките се соочуваат со притисок да ги искористат заштедите што ги нуди вештачката интелигенција, некои водечки банкари во Европа предупредуваат дека со интеграцијата на технологијата не треба да се брза.

Конор Хилери, соизвршен директор на „JPMorgan Chase“ за Европа, Блискиот Исток и Африка, изјави: „Една работа на која мораме да бидеме многу внимателни – во оваа брзина и возбуда околу вештачката интелигенција во нашиот банкарски свет – е луѓето да не го изгубат разбирањето за основите и темелите“.

Тој додаде дека „JPMorgan“ се обидува да пронајде рамнотежа меѓу користењето на вештачката интелигенција за забрзување на основните функции и обезбедувањето дека помладите вработени и понатаму ќе бидат соодветно обучени за клучните задачи. „Во спротивно, создаваме голем проблем за иднината“, заклучи Хилери.