Сето ова е Малта, земја со која сме поврзани со директна авионска линија.

Иако е мала по површина, Малта нуди бројни знаменитости и возбуди

Површината на Малта е 316 квадратни километри, во споредба со нашата земја која има површина од околу 25.713 квадратни километри, што ја прави Македонија речиси 80 пати поголема од оваа медитеранска земја.

Токму поради големината, Малта е лесна за истражување. Од живописни градови, неверојатни плажи, скриени заливи до природни убавини, навистина има многу што да се види (и прави) во оваа медитеранска убавица, а на секој чекор ќе го почувствувате преплетувањето на различни култури и обичаи.

Валета е вистински град-споменик

Главниот град на Малта, Валета е најмалиот главен град во Европската Унија и претставува идеална мешавина од историја и модерен живот. Јадрото на ова морско пристаниште и главен град на Малта, сместено на североисточниот брег на островот е изградено на ’ртот на планината Скиберас, која се протега како јазик сè до средината на заливот, кој го дели главниот град на две пристаништа, Големото пристаниште на исток и пристаништето Марсамкет на запад.

Градот го граделе витезите на Свети Иван во 16 век, кои зад себе оставиле дури 320 споменици вредни за восхит, од кои сите се признати од УНЕСКО, кој ја вклучил целата област на листата на светско наследство.

Со својата специфична архитектура, шармантните градски улици и фасадите на зградите, Валета во многу аспекти потсетува на Дубровник, па затоа не е изненадува што често е во центарот на филмските снимања. Таму е снимена и глобално популарната серија „Игра на тронови“.

Мдина е позната како „тивок град“ преполн со историја

Сместен на врвот на рид со поглед на големи делови од Малта, Мдина е мал средновековен град исполнет со историја и една од најголемите туристички атракции на островот. Попозната како „Тивок град“ (Silent City) Мдина е опкружена со ѕидини од стариот град Рабат, а нејзините тесни калдрмисани улици ја откриваат приказната за историјата долга со векови и различните владетели кои владееле со Малта.

Таму е зачувано наследство кое датира од пред околу 4.000 години, а благороднички куќи, приватни капели и импозантни катедрали се само дел од знаменитостите што можете да ги посетите во стариот град.

Марсакслок е шарено и шармантно село

Марсакслок е прекрасно мало рибарско село, едно од ретките на островот што ја преживеал глобализацијата и го задржал традиционалниот, автохтон малтешки начин на живот. Идеално е да се посети во недела, денот кога локалните рибари се собираат со свежа риба на отворениот пазар.

Најголемото рибарско пристаниште во Малта е во фокусот на бројни фотографи и уметници, а она по што е познат се традиционалните живописни бои на бродовите, куќите и тезгите.

Селото на Попај е атракција што не се пропушта

Во прекрасен залив на северозападот од Малта, се наоѓа селото на Попај, местото каде што живеел познатиот херој кој развеселувал бројни генерации. Пред повеќе од 40 години, овој малтешки залив бил само еден од прекрасните заливи и плажи на островот.

За потребите на снимањето на филмот за морнарот Попај, во 1979 година, режисерот Роберт Алтман и екипа од 165 луѓе изградиле село од 19 автентични куќи во шарени бои. Денес, селото на Попај е музеј на отворено, а посетители од целиот свет доаѓаат во селото за да се запознаат со светски познатите цртани ликови.

Островите и островчињата се дел од шармот на Малта

Островите Комино и Гозо се неизоставен дел од истражувањето на Малта. Комино е претежно карпест остров, со назабени карпи, две мали песочни плажи, волшебни заливи и испрекината крајбрежна линија што ќе ја засакаат сите оние кои ќе одлучат да ја посетат Малта. Популарното излетиште познато е по својата тиркизна плажа „Сина лагуна“ што го прави идеално за истражување, релаксација, пливање и нуркање.

Гозо е втор по големина малтешки остров, по Малта и популарна дестинација за излет. Во споредба со поголемиот соседен остров, тоа е порурална област позната по својот ридест терен. До него постојат редовни фериботски линии и организирани патувања со брод.