Нееднаквоста во богатството ширум Европа е изразена, а податоците за имотот по возрасно лице откриваат јасен јаз меѓу побогатите и посиромашните земји. Нето-вредноста, односно богатството, се дефинира како вкупната вредност на имотот на домаќинството намалена за долговите, а опфаќа финансиски и реален имот како што се недвижностите.

Според „Глобалниот извештај за богатство 2025“, кој го објави компанијата „UBS“, просечното богатство по возрасно лице во 2024 година значително се разликувало во 31 европска земја – се движело од 29.923 евра во Турција до дури 634.584 евра во Швајцарија, пишува „Euronews“.

Швајцарија и Луксембург на врвот

Во рамките на Европската Унија јазот е нешто помал, но и понатаму значаен, со распон од 44.568 евра во Романија до 523.591 евра во Луксембург. Швајцарија и Луксембург се единствените земји во кои просечното богатство по возрасно лице надминува 500.000 евра. На третото место се наоѓа Данска со 444.898 евра.

Просечно богатство поголемо од 300.000 евра е забележано и во Холандија (342.477 евра), Норвешка (340.364 евра), Белгија (322.805 евра), Обединетото Кралство (313.840 евра) и Шведска (308.935 евра).

Тоа го прави Обединетото Кралство најбогато меѓу петте најголеми европски економии, додека Италија е на дното со просечно богатство од 198.321 евра. За споредба, во Франција тој износ изнесува 278.550 евра, во Германија 237.172 евра, а во Шпанија 215.945 евра.

Во повеќе од една третина од анализираните земји просечното богатство по возрасно лице е пониско од 100.000 евра. Во таа група спаѓаат Летонија (91.783 евра), Чешка (86.791 евра), Хрватска (76.358 евра), Естонија (72.276 евра), Литванија (63.189 евра), Словачка (58.573 евра), Полска (56.159 евра), Унгарија (55.276 евра), Бугарија (47.798 евра), Романија (44.568 евра) и Турција (29.923 евра).

Во извештајот се наведува дека и просечното и медијалното богатство имаат свои ограничувања и можат да дадат многу различни резултати. Медијаната ја претставува точната средна вредност во распределбата на богатството, односно вредноста што го дели населението на две еднакви половини.