Борба со трошоците во Лондон

Џорџ Лејнг (32) натрупувал долгови поради високите трошоци за живот во британската престолнина. Половина од платата му одела за кирија, а остатокот на сметки и даноци. Секој месец се задолжувал за дополнителни 343 евра за да ги покрие другите трошоци, вклучувајќи го и превозот до работа. Откако ја изгубил работата како ноќен работник, неговиот долг пораснал на 11.457,38 евра и почнал да бара излез.

Можност на Сицилија

Решението го нашол во италијанската шема за продажба на куќи за 1 евро. Во декември 2022 година купил трисобна куќа во руинирана состојба на Сицилија.

„Имав куп долгови поради лошите одлуки што ги носев кога бев помлад – кредитни картички, телефонски сметки, позајмување пари од семејството“, изјавил Џорџ, родум од Камден. „Освен тоа, Лондон е прескап, па живеев од плата до плата и практично бев заробен. Само сакав покрив над глава, нешто за кое ќе знам дека е мое и дека секогаш ќе го имам“, додал тој.

„Ги видов тие евтини куќи и почнав да испраќам прашања во околу четириесет градови. Изборот беше меѓу Мусомели и Бугарија, која исто така има евтини недвижности, но ми се јавија од Сицилија, па го букирав најевтиниот лет на Рајанер што го најдов“, се присетил тој. „На разгледувањето со нас имаше Американци, а еден од нив веќе резервирал пет од шест куќи. Морав да го молам да ми ја препушти последната и успеав да ја добијам“, додал Џорџ.

Живот на градилиште и нов почеток

Џорџ се вселил во куќата без приклучок за вода и струја и следните 18 месеци сам ја обновувал.

„Спиев во куќата и одржував хигиена со влажни марамчиња бидејќи немав ни вода ни струја, а во рестораните се прикрадував за да користам тоалет“, раскажал тој. „Секако, ќе одев во хотел ако ситуацијата станеше сериозна, но се обидував да го избегнам тоа бидејќи тоа беа пари што можев да ги вложам во куќата“, објаснил Британецот.

Напредокот почнал да го снима и објавува на ТикТок, Инстаграм и Фејсбук, прикажувајќи ја обновата и други куќи во околината. Популарноста, како што рекол, му донела доволно пари да изнајми друг сместувачки простор додека работи на куќата и во рок од две години целосно да ги затвори долговите.

Од долг до удвоени приходи

Благодарение на заработката од социјалните мрежи, Џорџ денес заработува двојно повеќе отколку на претходната работа во Лондон и истакнал дека потегот што го направил му го спасил животот.

„Сè работам сам. Моите профили, на кои споделувам информации за куќите од едно евро, целосно експлодираа – не очекував дека ќе станат толку популарни“, рекол тој.

Во меѓувреме купил и втора куќа за едно евро, трикатница што ја преуредува во гарсониери, додека живее во првата обновена куќа. Изработил и водич од 40 страници за преселување во Италија, кој го продава за 34 евра и веќе продал стотици примероци. Дополнителни 3.000 евра заработил со продажба на предмети што ги пронашол во куќата на интернет-аукции.

Планови за иднината

Џорџ вели дека е единствен сопственик на двете куќи и дека не планира да ги продаде. Целта му е да изгради бизнис со недвижности.

„Сè правам сам, немам никакво градежно искуство и попатно направив многу грешки. Во првата куќа мислев дека цементот се состои само од песок и вода и брзо сфатив дека тоа не е така“, признал. „Бидејќи сè работам сам, многу е поевтино. Постојано учам и тоа ќе ми помогне еден ден да вработам луѓе кога од ова ќе направам бизнис“, додал Џорџ.

Неговите планови се амбициозни. „Целта ми е да имам педесетина недвижности, па ќе морам да соберам тим што ќе ми помогне. Дали тоа ќе биде компанија со седиште во Велика Британија или на Сицилија, сè уште не знам. Размислувам и за купување стари сиропиталишта и болници за преуредување, како и земјиште покрај плажа“, истакнал Британецот.

„Животот не би требало да биде толку скап“

Осврнувајќи се на животот во Лондон, рекол дека бил принуден да се откаже од излегувања затоа што пивото било прескапо.

„На крај ќе потрошиш околу 50 евра само за да седиш еден час со пријатели во ладна просторија. Лондон е многу забавен ако си богат, стана игралиште за милионери. Ми беше доста од плаќање кирија, само сакав да купам своја недвижност, но добивањето хипотека беше невозможна мисија“, раскажал Лејнг.

Денес е задоволен од животот на Сицилија. „Многу луѓе овде се во четириесеттите или педесеттите години, ги испратиле децата во приватни училишта, сè уште се под кирија и имаат можеби 57.000 евра заштеда. Доаѓаат овде бидејќи ова е едно од ретките преостанати места каде што можете да купите убава четирисобна куќа за помалку од 34.000 евра. Сите се неверојатно љубезни и само сакаат да се опуштат и да уживаат во остатокот од животот. Ова е најдобрата работа што нѝ се случила на сите нас“, објаснил Британецот.

„Мојата баба беше првата личност во моето семејство што купи дом. Пред 60 години во Лондон купила четирисобна куќа за 9.000 евра. Денес тоа не би било можно – еднособен стан во Лондон чини повеќе од 570.000 евра“, нагласил Џорџ. „За мојот стан во Лондон плаќав 1.489,46 евра месечно, а сега поседувам сопствени домови и имам добри приходи. Одржувам семинари за да им помогнам на луѓето да го направат истото што и јас – животот не би требало да биде толку скап“, заклучил Лејнг.