Иако најпрво привлече внимание во модниот свет, денес Камила сè повеќе гради актерска кариера, а публиката во последните денови не престанува да ја коментира и поради физичката сличност со една од најпознатите поп-ѕвезди на денешницата, Дуа Липа.

Од модните писти до телевизиските и филмските улоги, 28-годишната актерка и манекенка во последните години е сè поприсутна во Холивуд, а беше и во врска со Леонардо ди Каприо. Еве која е убавата Камила, од каде доаѓа и зошто сè повеќе се зборува за неа.

Од модата до глумата

Камила најпрво привлече внимание во модната индустрија, но набргу се сврте кон глумата. По улогата на тинејџерка од Монтана во филмот „Mickey and the Bear“, следуваше забележителната улога на Камила Алварез-Дан во серијата „Daisy Jones & The Six“.

Сега се врати на малите екрани во серијата на Нетфликс „Something Very Bad Is Going To Happen“, во која ја толкува Рејчел, централниот лик во приказната. Нејзиниот лик, во пресрет на свадба, се наоѓа во низа комплицирани и непријатни ситуации.

И додека самата серија предизвика голем интерес кај публиката, гледачите почнаа да зборуваат и за нешто друго – неверојатната сличност на Камила со Дуа Липа.

Гледачите забележале сличност со Дуа

Откако серијата пристигна на Нетфликс, социјалните мрежи брзо се преполнија со коментари за тоа колку Камила во некои кадри потсетува на Дуа Липа. Еден корисник на Икс напишал: „Камила Мороне изгледа како Сандра Булок и Дуа Липа да добиле ќерка.“

Друг корисник додал: „Малку ме плаши колку Камила Мороне во некои сцени личи на Дуа Липа и мило ми е што и другите се согласуваат“.

Затоа многумина почнаа да се прашуваат дали меѓу нив двете постои вистинска семејна врска, но одговорот е едноставен – Камила Мороне и Дуа Липа не се во роднинска врска.

Американската актерка и манекенка е родена на 16 јуни 1997 година како Камила Ребека Мороне и моментално има 28 години. Иако е родена во Калифорнија, има аргентинско потекло. Има тројно државјанство: американско, аргентинско и италијанско.

Пораснала во Лос Анџелес, а средното училиште „Beverly Hills High School“ го завршила во 2015 година.

Доаѓа од семејство поврзано со Холивуд

Иако денес самата си гради име на сцената на славните, Камила уште од мала е поврзана со Холивуд.

Таа е ќерка на Максимо Мороне и Лусиле Полак, попозната по уметничкото име Лусила Сола, а и двајцата се аргентински актери. Семејството се преселило во Лос Анџелес непосредно пред нејзиното раѓање, а родителите се развеле во 2006 година.

По разводот со Максимо, Лусила во 2008 година започнала врска со Ал Пачино. Биле заедно десет години, сè до раскинувањето во 2018 година, а Камила и денес славниот актер го смета за очув. Со него останала блиска, а еднаш и се пошегувала велејќи дека посетувала „актерска школа на Ал Пачино“.

Камила ја започнала манекенската кариера во 2016 година, соработувајќи со брендови како „Мошино“, „Викторијас Сикрет“, „Сефора“, „Келвин Клајн“ и „Шанел“. Своето филмско деби го остварила уште во 2013 година во проектот „Bukowski“ на Џејмс Франко. На пошироката публика најпозната ѝ е по улогата во серијата „Daisy Jones & The Six“, снимена според романот на Тејлор Џенкинс Рид. Во таа серија ја толкувала Камила, а улогата ѝ донела и номинација за Еми. Неодамна ѝ се приклучила и на втората сезона на серијата „The Night Manager“, во која ја толкува Роксана Боланос, покрај Том Хидлстон и Диего Калва.

Се појавила и во филмовите „Never Goin‘ Back“, „Death Wish“, „Valley Girl“ и во драмата „Mickey and the Bear“ од 2019 година.

Љубовниот живот „под лупа“

Изгледа дека Камила повеќе не е слободна. Во 2024 година започнала врска со режисерот на музички спотови Кол Бенет, а странските медиуми пишуваат дека сè уште се заедно.

Посебно внимание во јавноста, сепак, привлече нејзината поранешна врска со Леонардо ди Каприо. Тие двајца започнаа врска на почетокот на 2017 година, кога Камила имаше 20 години, а холивудската ѕвезда беше во четириесеттите. Меѓу нив имаше разлика од 22 години. Врската траеше околу пет години, а раскинаа во 2022 година. Благодарение на манекенството, глумата и соработките со брендови, се проценуваше дека богатството на Камила во 2024 година изнесувало околу три милиони долари.

Активна е и на Инстаграм, каде што под профилот „@camilamorrone“ споделува модни кампањи и сцени зад кулисите на своите телевизиски проекти.