Технолошкиот гигант „Oracle“ направи „значајни“ намалувања на работни места во вторникот, според објавите на високиот персонал на интернет, бидејќи инвестира многу во вештачка интелигенција.

Повеќе работа со помалку луѓе

Мајкл Шеферд, виш менаџер, не бил засегнат од намалувањата на работните места, но напишал дека „виши инженери, архитекти, оперативни менаџери, програмски менаџери и технички експерти“ се отпуштени. Тој кажал дека намалувањата не се засновани на перформансите. „Oracle“ одбил да коментира.

„Оracle“ интерно користи алатки за вештачка интелигенција, а раководителите претходно изјавиле дека им овозможува на помалку вработени да работат повеќе. Се верува дека околу 10.000 луѓе досега ги загубиле своите работни места, изјавил еден вработен за Би-Би-Си во вторникот, наведувајќи пад на бројот на вработени активни во внатрешниот систем за пораки на „Оracle“, „Slack“.

„Засегнатите лица не беа отпуштени поради нешто што го направиле или не го направиле“, изјавил гореспоменатиот Мајкл Шеферд.

Неговата објава беше една од десетиците што ги опишуваа отпуштањата. Кендал Левин, поранешен вработен во „Oracle“, изјавила дека нејзината позиција е „укината како дел од масовното намалување на бројот на вработени во компанијата“. Таа додала и дека сè уште „искрено верува“ во насоката во која се движи компанијата. Неколку други, сега поранешни вработени, опишале дека рано наутро добиле е-пошта со која ги информирале дека повеќе не се вработени и дека ќе добијат месечна финансиска компензација.

„Oracle“ е една од најголемите технолошки компании во светот и нуди софтвер и инфраструктура за „cloud computing“ на други компании. Лари Елисон, еден од најбогатите луѓе во светот, е коосновач, претседател и главен директор за технологија на „Оracle“.

Плановите во рамките на „Оracle“ за значителни отпуштања започнаа претходно оваа година. „Oracle“, кој вработил 162.000 луѓе во мај 2025 година, одбил да коментира. Цената на акциите на компанијата падна за 25 проценти оваа година, што е поголем пад од падот на сите други технолошки компании, пишува „Си-ен-ен“.

Приоритетна вештачка интелигенција

„Oracle“ продолжува да ја продава својата водечка база на податоци за складирање и обработка на корпоративни информации. Во последниве години, заедно со конкуренти како „Amazon“, компанијата ги зголеми капиталните трошоци додека гради инфраструктура на центри за податоци што може да се справи со работните оптоварувања со вештачка интелигенција. Но, „Oracle“ е помал од своите конкуренти во областа на „cloud“ технологиите.

Тврдењата слични на оние на раководителите на „Oracle“ дека компаниите можат да користат алатки за вештачка интелигенција за да работат повеќе со помалку вработени, доаѓаат од технолошки лидери како Марк Закерберг од „Meta“ и Џек Дорси од „Block“. Двајцата раководители, исто така, ги надгледуваа отпуштањата во нивните компании оваа година. Сепак, ваквите лидери во технолошката индустрија неодамна спроведуваа масовни отпуштања речиси секоја година. Претходните рунди на отпуштања не се припишуваат на вештачката интелигенција. Други технолошки компании што отпуштија работници оваа година се „Amazon“, „Pinterest“ и „Epic Games“.

Отпуштањата во „Oracle“ доаѓаат во време кога компанијата инвестираше многу во вештачка интелигенција, трошејќи и на сопствена инфраструктура и на партнерства со други компании како што е „Open AI“. 

„Oracle“ е исто така дел од иницијативата „Stargate“, заедно со „Open AI“, „Softbank“ и „MGX“, инвестициски фонд за вештачка интелигенција поддржан од американскиот претседател Доналд Трамп. „Stargate“ е проект од 500 милијарди долари за изградба на капацитет на центри за податоци во САД, за кој спонзорите велат дека е потребен поради планираното зголемување на обработката и побарувачката за напојување на вештачката интелигенција во следните неколку години.

Брзината на големиот капитал

„Инвестирањето во инфраструктура на вештачката интелигенција е капитално интензивно, но нашиот оперативен модел е оптимизиран за да се обезбеди профитабилност“, изјавил Клејтон Магваер, ко-извршен директор на „Oracle“, претходно овој месец.

„Невидено е толку брзо да се скалира бизнис што бара голем капитал“, додал тој.