Откако компанијата пријави 48 отсто пад на нето добивката во првото полугодие во споредба со истиот период минатата година, извршниот директор Таварес се најде на удар на американските трговци на мало и синдикатите на автомобилската индустрија. Како одговор, "Stellantis" најави промени во управувањето „за подобрување на организациските перформанси во турбулентна глобална средина“.

Заедно со најавата дека бараат замена за генералниот директор во пензија, назначија и нов финансиски директор – Даг Остерман. Тие го сменија и главниот човек за европскиот бизнис, односно Жан-Филип Импарато го замени Уве Хохгешурц во таа улога, а Антонио Филоса, извршен директор на брендот "Jeep", дојде на чело на бизнисот во Северна Америка.

Стоички го поднесува заминувањето, страстен за работата

Таварес е свесен за потребата од такви кадровски реконструкции и ги поднесува многу стоички додека жестоко зборува за проблемите на индустријата за кои, како што вели, сите останати молчат. „Во овој дарвински период за автомобилската индустрија, наша должност и етичка одговорност е да се приспособиме и да се подготвиме за иднината подобро и побрзо од нашите конкуренти, со цел да обезбедиме чиста, безбедна и достапна мобилност“, ја пренесува неговата изјава "Le Monde".

За време на посетата на француската фабрика на "Peugeot" во средината на октомври, Таварес рече дека најверојатно ќе се пензионира во јануари 2026 година.

„Лицето кое ќе одговори на вашите прашања во 2026 година ќе има 68 години. Тоа е разумна возраст за пензионирање“, им рече Таварес на новинарите во фабриката во Сошо во источна Франција. Ваквите изјави на "Stellantis" беа придружени со информацијата дека се бара негов наследник и дека за таа цел е формиран посебен комитет.

Таварес разговараше многу со новинарите пред саемот за автомобили во Париз, каде што се сретна со францускиот претседател Емануел Макрон. Во коментарите за медиумите тој предупреди дека не ја исклучува можноста за затворање на фабриките поради се посилната кинеска конкуренција.

„Ако кинеските производители обезбедат десет отсто удел во Европа, тоа значи 1,5 милиони автомобили. Толку се склопуваат во нашите седум фабрики“, рече шефот на "Stellantis", Карлос Таварес за францускиот деловен весник "Les Echos". Тој објасни дека со такво темпо на кинеска конкуренција, европските производители ќе мора да затворат фабрики или да ги предадат на Кинезите. „Никој не зборува за тоа“, изјави тој и додаде дека затворањето на границите за кинеските производи е замка.

Кој е Таварес?

Роден во Лисабон, шефот на "Stellantis" го напуштил својот португалски дом на седумнаесетгодишна возраст и заминал во Франција, каде што се стекнал со диплома за инженер во "Ecole Centrale" во Париз. Како автомобилски ентузијаст од рана возраст, тој почнал да се трка како аматерски како тинејџер. Тој, исто така, учествуваше на релито во Монте Карло со својот тим "Clementeam Racing". За време на викендите често можел да се види како учествува на трки со автомобили.

Покрај тоа, тој е страстен колекционер на класици, па според "Financial Times", неговата гаража вклучува "Peugeot 504 V6 Coupe" од 1979 година, "Alpine A110" од 1976 година и "Porsche 912" од 1966 година. Можно е оваа колекција да се проширила со текот на времето со некои легендарни примероци од автомобилското минато.

Неговата страст кон автомобилите го довела до првата работа, која му го одредила патот. Имено, тој како дваесет и тригодишен се вработил како инженер за тест возење во "Renault". Сменил неколку позиции во таа француска групација, а меѓу другото, беше задолжен за проектот "Renault Megane II".

Кариерата го однесе во "Nissan", кој веќе беше партнер на "Renault". Таму помина седум години, прво како програмски директор, потоа како потпретседател за стратегија и планирање производи, а во 2005 година беше именуван за извршен потпретседател и се приклучи на одборот на директори.

Ароганцијата го одвела до "PSA"

Тој се врати во "Renault" во 2011 година како оперативен директор, известувајќи му на Карлос Гон, претседател и главен извршен директор на "Renault" и "Nissan". Иако извесно време доста добро се сложуваа, една арогантна изјава на Таварес го чинеше работа во 2013 година. Тој изјави дека сака да стане шеф на компанијата. Госн бараше да му се извини на персоналот, а наместо тоа, Таварес поднесе оставка од "Renault".

Не чекал долго за нова можност. Тој завршил на чело на Групацијата "PSA" веќе следната година и почнал да работи, намалувајќи ги трошоците и зголемувајќи го пазарниот удел на компанијата во Кина, враќајќи ја профитабилноста на компанијата. Во тој период, "PSA" го презеде "Opel", ја основаше марката "DS Automobiles" и преговараше за спојување со "Fiat Chrysler". Тоа е она што се случи во јануари 2021 година, кога беше создаден "Stellantis", на чие чело од првиот ден беше човекот кој се спротивстави на индустриската легенда Госн.

Оженет и татко на три деца, Таварес често беше мета на критики, особено затоа што сака да зборува во јавноста за високите цени, инфлацијата и да ги предупредува потрошувачите за зголемените трошоци, а во исто време заработува многу пари. Што би знаел за тој за тоа колку е тешко да се преживее. Минатата година, на пример, неговата плата беше 36 милиони долари. Марин Ле Пен и Макрон беа изненадени од неговите огромни приходи кога беа претседателски кандидати во предизборната кампања.

Денес, како што предупредува на можното пропаѓање на автомобилската индустрија, многумина прстот го вперуваат во неговите платни списоци, кои секако не придонесуваат за опстанокот на компанијата.