"Apple" сè уште опседнат со идејата за целосно стаклен "iPhone"

Компанијата "Apple" повторно ја потврдува својата долготрајна фасцинација со стаклото, што го покажува и нивниот најнов одобрен американски патент кој опишува целосно стаклени куќишта за идни уреди, вклучувајќи: "iPhone", "Apple Watch", па дури и "Mac Pro". Патентот ги прикажува уредите со стаклени површини од сите страни – предна, задна и странични, со цел да се постигне совршен, проѕирен изглед и интерфејс што може да се користи од било кој агол.

Според содржината на патентот, стаклените површини не се само за естетика. "Apple" разгледува и вградување на зони чувствителни на допир и притисок по страните и задната страна на уредите, овозможувајќи мултистрана интеракција, во зависност од начинот на кој корисникот го држи уредот. Овие површини би можеле контекстуално да се менуваат во зависност од ориентацијата на уредот, така што интерфејсот секогаш ќе биде приспособен, без разлика која страна е насочена кон корисникот.

Во конкретниот случај на "iPhone", патентот опишува дизајн од шест стаклени страни, каде што екранот може да се прикажува на која било површина, со отвори за звучници, микрофони и останати компоненти. Уредот би можел делумно да се расклопи за поправки, што е значајно подобрување во однос на претходните стаклени дизајни кои беа тешки за сервисирање.

Покрај "iPhone-от", патентот опфаќа и други уреди – "Mac Pro" со куќиште во форма на осумаголна стаклена призма-кула, како и "Apple Watch" кој е речиси целосно изработен од транспарентно стакло. Некои концепти предвидуваат деформирање на страните, со можност корисникот да активира функции со стискање на рабовите, како што се контроли за музика или звук – идеја што потсетува на некогашната "3D Touch" технологија.

Иако патентите не се гаранција дека овие производи навистина ќе се појават на пазарот, тие нудат увид во долгорочната визија на "Apple" – создавање на уреди кои изгледаат како да се од иднината, со подлабока и попространа интеракција. Идејата за "iPhone" изработен од еден целосен блок стакло беше и лична амбиција на поранешниот главен дизајнер Џони Ајв, а ваквите патенти укажуваат дека "Apple" сè уште не се откажал од тој сон, пишува "MacRumors".