Нов проблем – сега имаат премногу полначи за електрични автомобили?!

Еден од најголемите предизвици за електромобилноста долго време беше недостигот од полначи. Тоа создаваше страв кај сопствениците и возачите на електрични автомобили: Дали ќе успеам да го наполнам возилото на следната станица? Што ако е зафатена, а во ред чекаат уште две возила? Ќе стигнам ли до следниот полнач пред да ми се испразни батеријата? Но, дали навистина е така?

На најважниот европски пазар – Германија – се појавува нова загриженост. Имено, големите инвестиции во полначи тешко дека ќе се исплатат на краток рок.

Бројот на новорегистрирани електрични автомобили во Европската унија порасна за речиси една четвртина и достигна околу 413.000 возила во првото тримесечје од 2025 година, во споредба со истиот период минатата година.

Сепак, според податоците на Здружението на европски производители на автомобили (ACEA), овој пораст е под очекувањата. Како една од главните пречки за побрз раст на продажбата често се наведува недоволниот број полначи. Но, дали тоа е навистина причината?

Бројот на јавни полначи во Германија се зголемил за околу 20% и сега изнесува 161.686 во споредба со претходната година.

Во оваа бројка се вклучени и 36.278 брзи полначи, чиј број се зголемил за дури 39% за само една година. Сепак, германскиот индустриски портал "Automobilwoche" сега објавува дека илјадници полначи низ земјата главно се неискористени – со други зборови, стојат празни.

Поради ова, многу компании што инсталираат полначи планираат да го забават проширувањето на мрежата и да ги намалат своите инвестиции.