Илон Маск ја уништува Тесла: Продажбата на возила во слободен пад, кризата подлабока отколку што се мислеше

Вкупните приходи на компанијата се намалени за 9 проценти, а автомобилскиот сегмент особено претрпе – со пад на приходите од 20 отсто, додека клиентите се свртуваат кон алтернативи поради тековните контроверзии.

Извршниот директор Илон Маск се наоѓа во центарот на критиките, обвинет дека го влече брендот на Tesla надолу со своите екстремни ставови и драстичните кратења на буџети, особено преку неговиот Оддел за владина ефикасност, кој помогна со стотици милиони долари во кампањата за реизбор на Доналд Трамп.

Се појави и движење под името „Tesla Takedown“, со протести пред салоните за продажба низ целата земја.

Продажбата падна глобално, а долгогодишниот поддржувач на Tesla, аналитичарот Ден Ајвс од Wedbush Securities, предупреди дека Маск ја довел компанијата во „ситуација на црвено предупредување“.

Tesla претходно соопшти дека испораките на возила се намалиле за 13 отсто во првиот квартал во споредба со истиот период минатата година.

Инвеститорите се сè повеќе загрижени поради тоа што Маск сè повеќе се фокусира на јавниот сектор и помалку на Tesla.

„Маск треба да се откаже од политиката, да се повлече од DOGE и да се врати како извршен директор со полно работно време на Tesla“, напиша Ајвс во белешка до клиентите. „Tesla е Маск, и Маск е Tesla... а секој што мисли дека штетата што ја предизвикал е пренагласена, треба да разговара со купувачи од САД, Европа и Азија.“

Дополнителни проблеми доаѓаат со трговската политика на Трамп – 25% тарифа за увоз на возила би можела да биде катастрофална за Tesla. Според Wall Street Journal, Tesla зависи од земји како Мексико за набавка на делови.

Во своето обраќање до акционерите, Tesla потврди дека трговската војна има негативно влијание, нагласувајќи дека „неизвесноста во автомобилската и енергетската индустрија расте, бидејќи трговските политики влијаат врз глобалните синџири на снабдување и трошоците.“

Единствениот сегмент каде што Tesla бележи значителен приход се јаглеродните кредити – 595 милиони долари од други автомобилски компании кои ги користат за надомест на емисиите на CO2.

Овој модел овозможува дополнителни приходи и придонесува кон глобалните напори за намалување на емисиите, а воедно ѝ овозможува на Tesla да остане конкурентна.

Tesla е во незавидна положба – вредноста на нејзините акции падна за над 50 отсто од врвот што го достигна по победата на Трамп на изборите минатата година.

Компанијата не нуди оптимистички прогнози за иднината – во последното соопштение до инвеститорите наведува само дека „ќе ја преиспита прогнозата за 2025 година во второто квартално ажурирање.“