Ви црвенее лицето откако ќе се напиете алкохол? Експертите велат дека тоа не е добар знак.
Бидете внимателни, бидејќи тоа може да биде знак дека сте изложени на ризик од разни видови рак, вклучително и рак на панкреас, предупредува д-р Мајкл Мрозински, експерт за итна медицина од Шкотска, пишува „Дејли мејл“.
Како што објасни тој, црвенилото по пиењето е знак дека токсичната хемикалија во алкохолот, ацеталдехид, се насобрала во вашето тело до потенцијално штетни нивоа. Оваа супстанца, со текот на времето, е „многу токсична за органите во горниот дигестивен тракт како што се желудникот, хранопроводот или панкреасот“.
Ова значи дека „ако се зацрвенете кога пиете, сте изложени на ризик од рак како што се рак на желудник, рак на хранопровод и потенцијално рак на панкреас“. На краток рок, високите нивоа на ацеталдехид прават многу штета на телото.
„Ќе се зацрвенете. Ќе добиете главоболка. Ќе чувствувате мачнина, може да добиете забрзано чукање на срцето…“, додаде тој.
Д-р Мрозински, исто така, ги предупредува луѓето да го разгледаат својот однос со алкохолот ако се меѓу оние што се црвенат кога пијат.
Во меѓувреме, д-р Јанис Мавроматис, генетичар и регистриран диететичар, претходно предупреди:„симптомите обично почнуваат веднаш по пиењето алкохол, со црвенило на лицето и топлина, главоболка и вртоглавица. Во потешки случаи, ова може да ескалира до гадење и повраќање, палпитации и тешкотии при дишењето.“
Способноста на телото да се ослободи од ацеталдехид – и со тоа да спречи црвенило – зависи од присуството на одредени гени, велат експертите.
Реакцијата на црвенило по алкохол се должи на генетска варијанта која се смета за една од најчестите во светот и е најчеста кај луѓето од источноазиско потекло.
Тоа е варијанта на генот што дава инструкции за производство на ензимот алдехид дехидрогеназа, кој помага во разградувањето на токсините.
Ова значи дека токсичниот нуспроизвод на алкохолот се акумулира во телото. Познато е дека ацеталдехидот предизвикува трајно оштетување на ДНК, што може да доведе до рак. Оштетувањето на ДНК може да предизвика рак на цревата, хранопроводот, црниот дроб, дојката, фаринксот, устата и гркланот, покажаа истражувањата.
Во Велика Британија, многу луѓе прават ДНК тест за да откријат дали се меѓу милионите луѓе кои се генетски предиспонирани за чувствителност на алкохол.
Изабела Рамос, нутриционист, објасни дека алкохолните пијалаци како што се вотка, виски и рум имаат поголема содржина на алкохол, што може да ги влоши симптомите.
„Некои вина и пива, особено црвените вина и одредени домашни пива, содржат повисоки нивоа на конгенери, кои се нуспроизводи на ферментација и можат да ги влошат симптомите“, додаде таа.
Но, мешањето на алкохол со безалкохолни пијалаци како што се тониците, исто така, може да помогне во ублажување на симптомите кај луѓето со чувствителност. Сепак, додаде таа, најбезбедната опција е да се консумираат пијалаци со ниска или нула содржина на алкохол, што ја намалува количината на етанол што телото треба да го метаболизира.
