Можеби мислите дека вашите навики во тоалетот се сосема нормални и здрави. Можеби редовно одите во тоалет и сакате да уживате во неколку минути мир и тишина, скролајќи на телефонот или читајќи добра книга. Меѓутоа, се чини дека ова може да биде штетно за вашето здравје на различни начини.

На пример, прекумерното бришење по голема нужда може да предизвика хемороиди. Покрај тоа, начинот на кој седиме на тоалетната школка може да доведе до непотребно свиткување на ректумот. Имено, идеалната положба всушност е чучањ. Сега лекарите предупредуваат и за опасностите што доаѓаат со поминување долго време во тоалет, особено кога читаме вести, проверуваме социјални мрежи и/или играме игри.

Според зборовите на д-р Лаи Сјуе, колоректален хирург од Универзитетот Тексас Саутвестерн во Далас, продолженото седење го зголемува ризикот од хемороиди и ги ослабува мускулите на карличното дно.

„Кога пациентите доаѓаат кај мене со тешкотии, еден од првите фактори што ги проверуваме е колку време поминуваат во тоалет“, изјави тој за Си-ен-ен.

Големата нужда треба да трае помеѓу пет и десет минути

Д-р Фарах Монзур, професорка по интерна медицина и раководителка на Центарот за воспалителни болести на цревата во болницата Стони Брук во Њујорк, откри дека големата нужда треба да трае помеѓу пет и десет минути. Според д-р Сјуе, сè што е подолго од тоа го зголемува ризикот. Крвта потешко циркулира бидејќи, како што вели тој, „се создава ефект на еднонасочен премин – крвта може да влезе, но тешко излегува“.

Како резултат на тоа, вените и крвните садови околу анусот и ректумот можат да отекнат, зголемувајќи го ризикот од хемороиди. Напрегањето за време на големата нужда ја влошува работата, бидејќи го зголемува притисокот и дополнително го поттикнува создавањето на хемороиди.

Д-р Монзур истакна дека користењето мобилен телефон додека седите може да биде лошо бидејќи ни го одвлекува вниманието и го продолжува времето што го поминуваме на тоалетната школка, честопати несвесно.

Покрај хемороидите, постои и ризик од ректален пролапс, кога дел од дебелото црево испаѓа низ анусот.

Д-р Сјуе додаде дека предолгото седење негативно влијае и на мускулите на карличниот дно, повторно поради ефектите на гравитацијата.

Ако ништо не се случи во рок од десет минути, прошетајте

„Денес сè повеќе луѓе поминуваат премногу време во тоалет, што е многу лошо за аноректалните органи и карличното дно“, рече тој.

„Не треба да одите во тоалет со идејата дека ќе поминете многу време таму“, додаде д-р Монзур. „Затоа не носете телефон или списание. Обидете се времето поминато во тоалет да биде што е можно пократко и целно“.

Ако ништо не се случи во рок од десет минути, подобро е да станете и малку да прошетате. Ова може да ја поттикне работата на цревата. Ако тоа не помогне, може да помогне чаша вода или оброк богат со растителни влакна (како овес и грав). Но, ако проблемите се повторуваат редовно, лекарите предупредуваат дека тоа може да биде знак за посериозно дигестивно нарушување, како што е синдром на иритабилни црева или Кронова болест.