На почетокот на оваа година, Аскрен беше хоспитализиран поради тешко воспаление на белите дробови предизвикано од стафилококна инфекција, по што помина 45 дена во кома, пред да му биде извршена спасоносна двојна трансплантација на бели дробови во јуни.

Само неколку месеци подоцна, неговото закрепнување напредува со неверојатна брзина.

Во неделата, Аскрен на социјалните мрежи сподели видео на кое се гледа како вежба една од своите препознатливи боречки техники.

„Речиси умрев … Никогаш нема да заборавам како се прави "arm drag", напиша тој во објавата на платформата „X“.

Фановите беа воодушевени од брзината на неговото закрепнување по искуство блиско до смртта.

„Толку ми е драго што си подобро“, напиша еден следбеник, додека друг додаде: „Ќе се врати во нормала за час.“

Многумина го нарекоа инспирација, а еден коментатор се пошегува:

„Братот е како ’Волверин‘, само со побавен фактор на заздравување.“

Коментарите со поддршка преплавија и други платформи.

„Имајќи предвид дека во јуни изгледаше како смртните објави за Бен се неизбежни – ова е неверојатно“, напиша еден корисник на „Reddit“.

Поддршка од сите страни

За време на најтешката борба во неговиот живот, ММА и боречката заедница се обединија во поддршка на Бен Аскрен.

Дури и неговите поранешни ривали, Џејк Пол и Хорхе Масвидал, му испратија пораки на охрабрување.

„Човече, добив само позитивни пораки“, изјави Аскрен во јули.

„И Хорхе Масвидал и Џејк Пол ми пишаа. Бев во шок – ’Од каде, по ѓаволите, дојде тоа?‘ Поддршката беше неверојатно широка, пристигнуваше од сите страни.“

Веројатно повеќе нема да се натпреварува

Поранешниот шампион на „Bellator“ и „ONE Championship“ се повлече од ММА во 2019 година, по три борби во „UFC“.

Аскрен, познат под прекарот „Funky“, беше непоразен и сметан за еден од најдобрите борци кои некогаш настапиле во ММА.

Сепак, неговиот дебитантски настап во „UFC“ заврши со пораз од Хорхе Масвидал, кој го нокаутираше за само пет секунди — најбрзиот нокаут во историјата на организацијата.

Аскрен тоа го прифати спортски.

Враќањето во ММА никогаш не беше реална опција, а операцијата на колкот во 2020 година дефинитивно ја затвори таа врата.

До појавата на болеста, тој тренираше и подучуваше борење и беше во доволно добра форма да настапи на првата гала на „Real American Freestyle“ на 30 август.

За жал, Аскрен верува дека тоа била неговата последна шанса да се натпреварува.

„Бев навистина возбуден поради борењето, а сега е тажно затоа што најверојатно никогаш повеќе нема да можам да се борам“, изјави Аскрен.

„Не велам дефинитивно ’не‘, но многу е малку веројатно — би рекол.“