Ова безглутенско зрно се издвојува не само по богатиот нутритивен профил, туку и по многуте потенцијални здравствени придобивки. Што е тоа што го прави амарантот вредно растение за воведување во исхраната?

Целосни протеини и богатство од хранливи материи

Амарантот е извонредна намирница на многу начини. Зрната содржат целосни протеини, што значи дека ги обезбедуваат сите девет есенцијални аминокиселини кои организмот не може сам да ги произведе. Освен тоа, амарантот е богат извор на калциум. Го содржи повеќе од повеќето класични житарки. Затоа е одличен избор за лица со целијакија, остеопороза или за оние кои сакаат да го зачуваат здравјето на коските.

Здравствени придобивки од редовната употреба на амарант

Во продолжение се наведени придобивките што може да ги донесе редовното консумирање амарант:

Помага во намалување на холестеролот

Амарантот е богат со влакна, и растворливи и нерастворливи, кои поволно влијаат врз здравјето на срцето. Растворливите влакна се врзуваат за холестеролот во дигестивниот тракт и го спречуваат неговото апсорбирање во крвотокот. Истражувањата на животни укажуваат дека амарантот може ефикасно да го намали нивото на лошиот (LDL) холестерол, но студиите кај луѓе сè уште не се доволно јасни и потребни се понатамошни испитувања.

Може да го намали високиот крвен притисок

Во амарантот се наоѓаат пептиди кои можат да придонесат за намалување на крвниот притисок. Студиите на животни покажале дека нивниот ефект може да биде споредлив со дејството на вежби со низок интензитет. Иако резултатите се ветувачки, потребни се дополнителни истражувања кај луѓе.

Има антивоспалително дејство

Амарантот содржи луназин, пептид со силни антивоспалителни својства. Истражувањата покажуваат дека може да ги намали воспалителните процеси и кај луѓето и кај животните. Ова е особено значајно кај воспалителни заболувања како артритис.

Ја регулира телесната тежина

Благодарение на високата содржина на влакна и протеини, амарантот може да помогне во регулирањето на апетитот и подобрувањето на метаболизмот. Овие хранливи материи го продолжуваат чувството на ситост, што може да биде поддршка за лица кои сакаат да одржат здрава телесна тежина.

Го чува здравјето на коските

Како богат извор на калциум и фосфор, амарантот може да придонесе за здравјето на коските. Студиите на животни покажале дека неговото внесување ја подобрува состојбата на коските кај глувци со остеопороза. Ова може да биде особено важно за жени во менопауза, кои се поподложни на губење на коскена маса.

Како да го користите амарантот?

Амарантот е исклучително разновидна состојка и може да се користи на различни начини во исхраната:

- подгответе каша со овошје и јаткасти плодови,
- додадете го во салати, супи или гулаш,
- користете го како замена за ориз, кускус или киноа,
- направете пудинг од амарант,
- употребете го во безглутенски печива во облик на брашно,
- додадете го во смути или енергетски плочки.

Иако амарантот е безбеден за консумирање, треба да се има предвид дека содржи сапонини – соединенија кои во поголеми количини можат да предизвикаат тегоби со варењето.