Ема Цептер, посвоената ќерка на брачната двојка, која е една од најбогатите во Србија, често на својот Инстаграм профил споделува детали од својот дом, а судејќи по фотографиите, таа живее во вистинска палата.

Како што пренесуваат локалните медиуми, вилата на Филип и Мадлена на Дедиње го добила името токму по нивната наследничка, која им го разубави животот во 2000 година кога стана дел од нивното семејство.

„Таа дојде во нашите животи еден декемвриски ден во 2000 година и веднаш се вгнезди во нашите срца каде што отвори простор кој претходно го немаше. Убаво е кога човек може да се реализира како создател, а потоа да стане родител, а уште поубаво е кога можете да исправите неправда и наместо болка, да создадете љубов. Мене ми се случи и првото и второто“, изјави Мадлена своевремено.

Таа ја пронајде својата база во Монако, додека често престојува во Париз, Виена и Милано. Нејзиниот сопруг го прошири својот бизнис на светско ниво, а Мадлена, која по професија е поранешен професор по книжевност, најмногу се занимава со културно-уметничко творештво во Србија.

„Ја препознавам таа нишка во моите семејни корени. Уште како дете сакав да ги усреќувам другите и како и секогаш во тоа ја имав поддршката од мојата драга мајка. Најважно е да можете да сочувствувате. Со текот на времето, тоа стана морална матрица на мојот однос кон луѓето. Имав среќа во мојот сопруг да пронајдам човек кој ги носи истите морални вредности во себе. А животот нѝ го враќа само она што им го даваме на другите“, изјави во една прилика госпоѓа Цептер за „Story“.

Ема студира психологија во Лондон

Инаку, малку се знае за животот на Ема, а освен она што го покажува на социјалните мрежи, познато е дека има 23 години, живее во Лондон и студира психологија.

Империјата на Филип Цептер, која тој ја гради повеќе од три децении, се протега на пет континенти, има повеќе од сто филијали и вработува околу 200.000 луѓе. Компанијата му носи околу една милијарда евра профит годишно.

„Имам два авиони. Трошам многу пари на авиони. Завршувам многу нешта додека летам од едно до друго место. Моите авиони се со весели бои и секој што лета со мене е изненаден кога ќе ги види. Доминираат нијанси на црвена и беж. Се случува и да спијам во нив“, истакна тој во една прилика за „Lepota i zdravlje“.