Трамп вети дека САД ќе имаат протекционистичка економија. Тоа треба да значи општа царинска стапка на увезената стока во износ од 10% до 20%, но со намалување на даночната стапка на добивката на домашните компании од 21% на 15%.

Со оглед на тоа дека илјада американски компании придонесуваат за бруто домашниот производ (БДП) на Ирска, се стравува дека поповолните даночни услови за тие компании и повисоките царини би можеле да ги доведат во прашање странските инвестиции во Ирска, а со тоа и работните места во оваа земја.

Главниот економист на Институтот за европски прашања, Ден О'Брајан, отиде дотаму што ја нарече потенцијалната нова американска тарифна политика „најголем краткорочен ризик“ за ирската и европската економија.

Имено, постои опасност од трговска војна меѓу САД и Европа, во време кога еврозоната бележи бавен економски раст кој може да прерасне во рецесија. Во таа трговска војна, Германија ќе настрада особено поради царините за автомобилите увезени од Европа.

Зошто Ирска е најзагрозена

Американските компании значително влијаат на ирската економија, а станува збор за компании од хемиската и финансиската индустрија, како и индустријата за информатичка технологија. Според Американската стопанска комора во Ирска, оваа година имало 970 американски компании во Ирска, кои вработувале 210.000 луѓе и придонесуваат за економијата со 41 милијарда евра.

Повеќето од првите 10 американски технолошки компании, вклучувајќи ги Microsoft, Meta, Amazon, Alphabet (Google) и Apple, работат во Ирска, придонесувајќи со 13% од нејзиниот вкупен БДП во нејзината економија.

Откако Обединетото Кралство ја напушти Европската Унија во 2016 година (Брегзит), Даблин стана најпопуларна локација за американските компании. Затоа, многу компании во овој град имаат европски седишта. Причината за ова е стапката на корпоративна даночна стапка од 12,5% или 15% за компании со приходи од над 750 милиони евра, работна сила која добро зборува англиски и пристап до пазар од 500 милиони луѓе.

Секторот за информатичка и комуникациска технологија генерира огромен раст во ирската економија, нови можности за вработување, инвестиции и иновации. Но, економистите веруваат дека царинската политика на Трамп може да ги промени овие текови.

Пречка за плановите на Трамп може да биде доколку републиканците не го контролираат целосно Конгресот. Иако сѐ уште е неизвесно што ќе се случи, во Ирска стравуваат дека нивната конкурентска предност ќе биде нарушена.

Ако Трамп драстично ги зголеми царините за странска стока, тогаш тие ќе бидат поскапи за Американците, што нужно ќе доведе до тоа да купуваат претежно домашни производи. На крајот на краиштата, странските производи би можеле да изгубат удел на пазарот. Минатата година ирскиот извоз во САД изнесуваше 54 милијарди евра, што е една осмина од вкупниот извоз на ЕУ во САД, пишува „Euronews“.