[ВИДЕО] Поставен апсолутен светски рекорд: Тенисери кои заедно се стари 199 години одиграле тениски натпревар
Во светот на тенисот поставен е уникатен рекорд - одигран е натпревар помеѓу најстари играчи во историјата кога ќе се земат предвид годините на двајцата.
Тие играле на Светското првенство за ветерани што се одржа во Бол (Хрватска).
Американецот Артур Линд и Австралиецот Хенри Јанг одиграле натпревар како најстари противници во историјата на тенисот. Јанг има 102 години, а Линд 97, што значи дека заедно имаат 199 години.
Меѓународната тениска федерација (ИТФ) го потврди соборувањето на рекордот со објави на социјалните мрежи.
Јанг (102) и Линд (97) се соочиле во четвртфиналето на Светското првенство на ИТФ за играчи над 90 години. Помладиот тенисер Линд победил со 6:1 и 6:2.
Овој натпревар ќе се памети не само по рекордните години, туку и како демонстрација на силата и решителноста на двајцата спортисти. За двајцата, тенисот не е само спорт, туку и начин на живот.
Потсетуваме Хенри Јанг исто така испишал историја во 2023 година кога станал првиот стогодишен тенисер кој се натпреварувал на ИТФ турнир што се одржал во Мајорка.
