Процесот на селекција е сложен и понекогаш тешко е да се снајдете во таквите разговори, затоа Папалија во видео објаснила што никогаш не треба да кажете или направите ако сакате да ја добиете работата.

1. Каде се гледате за пет години

„Никој не сака да слушне дека се гледате на постдипломски студии или дека планирате да се венчате и да имате деца“, рекла Папалија, дури и ако тоа е точно. Работодавачите сакаат да знаат колку сте навистина заинтересирани за работата и дали ја гледате како дел од вашата иднина. „Она што сакаат да го слушнат е: ‘Се гледам овде, во оваа компанија’“, додала таа.

Исто така, со ова прашање, работодавачот често сака да провери дали сте амбициозни, дали имате јасни и реални цели и колку сте мотивирани да ги остварите. Ова може да му помогне на испитувачот да процени дали вашите вредности се усогласени со вредностите на компанијата и како би функционирале како вработен.

2. Зошто барате работа

Дури и ако новата работа ја барате затоа што не сте биле задоволни од претходната, подобро е да ја задржите таа информација за себе. „Кажете нешто како: ‘Јас ја надминав својата позиција и барам нов предизвик’“, советува Папалија.

Стручњачката за вработување на извршен кадар Лиа Стивенс се согласува со тоа. „Можеби мислите дека вашите причини за заминување се оправдани, но правилото е едноставно – смирете го поривот и никогаш не зборувајте лошо за поранешниот работодавач. Зошто? Едноставно кажано, тоа отвора премногу прашања и остава негативен впечаток. Испитувачот дури може да помисли дека и вие сте биле дел од проблемот“, објаснила таа.

Не спомнувајте негативни работи, туку фокусирајте се на позитивните. Испитувачот најверојатно ќе даде предност на кандидат кој гледа на работите од пооптимистична страна или барем може така да се претстави.

3. Однос со шефот и колегите

„Не ми е важно дали работите за најлошиот шеф на светот кој сè микроменaџира. Не сакаме тоа да го слушнеме на разговор за работа“, рекла Папалија. „Особено ако ве интервјуира некој кој би можел да стане вашиот шеф.“ Работодавачите сакаат да знаат дека вработуваат некој кој може да ја заврши работата, без разлика на личните чувства кон луѓето околу него.

Тука најмногу важат вашата професионалност, емоционална интелигенција и дискретност. Прифатливо е кратко да се споменат несогласувања или предизвици кои сте ги имале со другите, но тоа лесно можете да го претворите во ваша предност. Разговарајте за тоа што сте научиле од таа ситуација или како тоа искуство ве развило.

4. Вашите хобија

Дури и ако е точно, веројатно не е добра идеја да му кажете на испитувачот дека целото слободно време го поминувате гледајќи „Netflix“. „Ве молам, изберете хобија кои звучат професионално и интересно“, советува Папалија. Наведувањето хобија кои кажуваат нешто за вашиот личен или професионален живот ќе ви помогне да се издвоите од другите кандидати.

Исто така, испитувачот можеби проверува дали ќе се вклопите добро во тимот според личноста и културата на компанијата. Дури и ако вашите хобија не се директно поврзани со работата, покажете малку ентузијазам кога зборувате за нив. Можеби дури ќе можете да го научите нешто ново испитувачот.

5. Опис на работата и назив на работното место

Во овој случај е соодветно малку да го „разубавите“ својата биографија и работните задачи за да оставите впечаток и да ги зголемите шансите за добивање работа. „Можете малку да го доработите, особено ако сте правеле повеќе од она што било во описот на вашата работа, а за тоа не сте биле платени“, рече Папалија.

Искористете ја оваа можност да дадете контекст на она што е наведено во вашиот животопис. Споменете релевантни и преносливи вештини од претходното искуство и објаснете како тие би можеле да се применат на работата за која се пријавувате.