Најновото остварување од Маранело ја продолжува ексклузивната линија на специјални "berlinetta" модели на "Ferrari": "Challenge Stradale", "430 Scuderia", "458 Speciale" и "488 Pista", секој од нив поставувајќи нови стандарди за возачко уживање. Сега на ред дојде моделот "296 Speciale".

Повеќе моќ

Погонот на "296 Speciale" нуди вкупно 880 коњски сили, што е 50 КС повеќе од стандардниот 296 GTB и претставува рекорд за "Ferrari" со погон на задни тркала. Бензинскиот "V6 twin-turbo" мотор сега развива 700 коњски сили (37 повеќе од основниот модел), а електромоторот е унапреден и нуди 180 коњски сили во новиот режим „extra boost“.

Новата стратегија за управување со 8-брзинскиот "DCT" менувач овозможува дополнителен вртежен момент при менување брзини, што ги скратува времињата на префрлување и го засилува возачкото доживување. Резултатот е 0 – 100 km/h за 2,8 секунди и максимална брзина над 330 km/h.

Иновативна аеродинамика

"296 Speciale" создава 435 kg притисок при 250 km/h, што е 20% повеќе од 296 "GTB", благодарение на иновативни решенија развиени врз основа на "296 Challenge". Меѓу нив се вклучени аеро-преклопник интегриран во предниот капак и вертикални перки на задниот дел од возилото.

Активниот заден спојлер користи нова стратегија која го преполовува времето на транзиција помеѓу конфигурациите со низок отпор (LD) и висок притисок (HD), а воведува и нова средна конфигурација (MD) што ја подобрува стабилноста на задниот дел при високи брзини.

Значително намалување на тежината

"Ferrari" посветил големо внимание на намалување на тежината, што придонело за подобрено возачко искуство. Вкупната тежина е намалена за 60 kg во споредба со "296 GTB", со користење на карбонски влакна за делови од каросеријата и титан за компоненти во моторот. Со тоа е постигнат рекорден однос тежина/моќност од само 1,60 kg/КС, најдобар досега кај "Ferrari berlinetta".

Дизајн инспириран од тркачки автомобили

Дизајнерскиот јазик на "296 Speciale" има јасни поврзаности со тркачките модели на "Ferrari". Додека "296 GTB" ги прикрива своите екстремни перформанси под елегантен изглед, "296 Speciale" усвојува многу порадикален стил. Предниот дел сугерира сила и агресија, со капак на моторот кој е подлабок и поистакнат, а сплитерот визуелно го проширува автомобилот.

Нова боја и ентериер

Новата впечатлива боја "Verde Nürburgring" е развиена специјално за "296 Speciale". Новитет е и новата ливреја, достапна првпат и во бела варијанта, со една или две надолжни линии што се протегаат по целата должина на автомобилот.

Ентериерот е максимално поедноставен, со намален број на елементи и зголемена употреба на карбонски влакна и алкантара. Панелите на вратите се изработени од еден блок карбон со минималистички дизајн, а централниот тунел е целосно изработен од карбонска структура.

"296 Speciale", како и сите модели на "Ferrari", доаѓа со седумгодишна програма за одржување, што ги покрива сите рутински сервиси во првите седум години од животот на автомобилот. Овој автомобил, кој уште сега се смета за колекционерски примерок, има очекувано висока цена – околу 400.000 евра – но за љубителите на вакви возила, тоа е само уште еден број.