[ФОТО] "Toyota bZ4X Touring" – електричен "SUV" што комбинира моќ, луксуз и изобилство простор
"Toyota" ја проширува понудата на својот електричен "SUV bZ4X" со новиот "Touring" модел, кој носи повеќе простор, поголема моќност и поголема разновидност.
Додека пазарот со нетрпение го очекува новиот "RAV4", "Toyota" го збогатува електричниот сегмент со попространата и повеќенаменска "Touring" верзија на "bZ4X", "SUV" кој сега е подготвен за вистински авантури.
Димензиите на новиот модел се зголемени – долг е 4.830 mm (за 140 mm подолг од стандардниот "bZ4X"), а висок 1.670 mm (за 20 mm повисок), што резултира со 33% поголем багажен простор – цели 600 литри.
"Touring" моделот се нуди со преден погон (FWD) или погон на сите тркала (AWD). Верзијата со преден погон развива 224 коњски сили, додека "AWD" верзијата достигнува импресивни 380 коњски сили, правејќи го најмоќното електрично возило на "Toyota" досега.
Возилото користи литиум-јонска батерија со капацитет од 74,7 kWh, со технологија на водено ладење и предзагревање, што овозможува досег до 560 километри според "WLTP" стандардот.
Поддржува брзо полнење до 150 kW, а достапни се и вградени полначи од 11 kW и 22 kW.
Послабата верзија од 224 коњски сили е идеална за градски услови, додека посилната верзија располага со "Toyota XMODE" систем за управување на погон на сите тркала, како и "Grip Control" технологија, која овозможува вистински "AWD" погон и подобрена стабилност на лизгави и непристапни терени.
Како и основниот модел, и "Touring" верзијата доаѓа со батериска гаранција од 10 години или еден милион изминати километри, со задолжителна годишна проверка.
"Touring" изданието има поголема каросерија, повеќе наклонета кон караванска форма, и добива ексклузивни дизајнерски детали: црни фелни и зајакнати кровни носачи со капацитет за товарење до 70 килограми.
Најголемите промени се на задниот дел – редизајнираниот заден браник и модерните "LED" светла го нагласуваат неговиот авантуристички карактер.
Возилото ќе се нуди во монохроматска палета на бои, меѓу кои и новата нијанса "Brilliant Bronze".
Ентериерот нуди нова централна конзола, јасна дигитална инструмент табла и 14-инчен инфотејнмент екран, кој доаѓа како дел од стандардната опрема.
"Toyota bZ4X Touring" ќе пристигне на европскиот пазар напролет 2026 година, а повеќе детали ќе бидат објавени пред почетокот на продажбата.
