Во штотуку отвореното дизајнерско студио, "Bentley" го претстави концептниот автомобил "EXP 15", кој претставува визија за иднината на брендот. Моделот е инспириран од легендарните "Grand Tourer" модели од почетокот на 20. век, особено "Bentley Speed Six Gurney Nutting Sportsman Coupe" од 1930 година, познат и како „Blue Train“.

Необичен дизајн со три седишта

"EXP 15" се издвојува со својата неконвенционална поставеност – има три седишта и три врати, наместо вообичаените четири или пет. Ова овозможува поексклузивно и луксузно патување за помал број патници. Со должина од над пет метри, моделот се одликува со иконска исправена предна маска, долга хауба и кабината сместена наназад.

Автомобилот ги комбинира традиционалните елементи – како луксузни седишта, инструмент табла во форма на крила и волан – со футуристички дигитални компоненти, кои можат да се прикажат или да исчезнат во позадина според потребите на возачот.

Одржливи материјали и модерни технологии

Внатрешноста на "EXP 15" е создадена со софтвер за виртуелна реалност, кој им овозможува на купувачите да го видат и искусат возилото во различни конфигурации. Избраните материјали претставуваат комбинација од традиционално занаетчиство и одржливост, заедно со технички и ултрамодерни решенија.

Робин Пејџ, директорот за дизајн на "Bentley", изјави дека концептот отелотворува пет главни дизајнерски принципи што ќе влијаат врз идните сериски модели. Првиот е „Исправена елеганција“ – идеја дека сите предни делови на "Bentley" треба да имаат блага вертикална кривина.

Вториот принцип е „Иконска решетка“, која и понатаму ќе биде централен визуелен елемент, и покрај транзицијата кон електрични погони. Третиот принцип е „Бесконечна линија на хаубата“, што потсетува на времињата кога под хаубата се сместувале големи мотори.

Поглед во иднината

Иако "EXP 15" не е наменет за сериско производство или продажба, тој претставува јасна најава за дизајнот на идните "Bentley" модели, вклучувајќи го и првиот целосно електричен автомобил на брендот, кој треба да пристигне наскоро. Концептот исто така ја истражува еволуцијата на седан-сегментот, со оглед на тоа што некои купувачи бараат класична силуета, други – модерен изглед, а трети – нешто повисоко и поробусно.