[ФОТО] „Рускиот Попај“ би можел да ги загуби двете раце поради тешка инфекција: Вбризгувал хемикалии

Според „New York Post“, Терешин се соочува со двојна ампутација на рацете откако годините вбризгување опасни хемикалии во мускулите довеле до инфекција опасна по живот.

Поранешниот руски војник со години ја шокира јавноста со своите неприродно големи бицепси, но ситуацијата сега ескалирала до критична точка.

Терешин неодамна споделил вознемирувачка снимка на социјалните мрежи на која се гледа дека еден бицепс буквално му „пукнал“.

Снимките покажуваат голема отворена рана и некротично, гнило ткиво под кожата. Оваа ужасна состојба се случила затоа што неговото тело почнало агресивно да отфрла туѓа супстанција – во неговиот случај, комбинација од синтол и евтин вазелин што го користел за да се обиде да постигне изглед на масивни мускули.

Медицинските експерти предупредуваат дека времето за спасување на „рускиот Попај“ истекува. Иако итно му се потребни операции за пресадување кожа во обид да се спасат рацете, лекарите во моментов не можат да го изведат зафатот.

Имено, инфекцијата е толку напредната и широко распространета што хируршкиот тим не може да интервенира додека не се смири воспалителниот процес. Според руските медиуми, ситуацијата бара мултидисциплинарен пристап.

За воопшто да се обидат да му ги спасат рацете на Терешин, ќе биде потребен тим од врвни експерти, вклучувајќи васкуларен хирург, пластичен хирург и специјалист по реконструктивна хирургија.

Инаку Терешин ја започнал својата трансформација во 2017 година, кога почнал да вбризгува синтол масло, а подоцна и вазелин во рацете. Неговите бицепси достигнале повеќе од 60 сантиметри во обем, што му донесе споредби со цртаниот лик Попај, како и големо медиумско внимание.

Сепак, цената на таа слава е висока. Хемикалиите предизвикале фиброза на ткивото (формирање на лузно ткиво) и некроза (одумирање на клетките).

Меѓутоа ова не е прв пат Терешин да се соочи со последиците од своите одлуки. Тој веќе бил подложен на операција во 2019 година за отстранување на стврднатиот вазелин и оштетеното ткиво, но се чини дека овие процедури не биле доволни за да се спречи долгорочното пропаѓање на мускулите.

И покрај претходните предупредувања и делумното отстранување на токсичните супстанции, преостанатото ткиво сега е толку инфицирано што раните не можат природно да заздрават.