Родителите на славниот швајцарски тенисер многупати можеа да се видат на трибините на тениските турнири како го бодрат својот син. Роџер Федерер често истакнуваше дека мајка му и татко му имале огромна улога на неговиот пат до успехот.

Мајката на Роџер Федерер пораснала во Африка

Мајката на Роџер Федерер е родена во Јужна Африка во 1952 година. Детството го поминала во Гермистон, во Јужноафриканската Република. Градот, познат и како Квадукатоле, претставува еден од клучните индустриски и транспортни центри на провинцијата Гаутенг.

Подоцна се преселила во Швајцарија каде што го запознала сегашниот сопруг и ги одгледувала децата. Често патува во својата татковина, на која ѝ помага преку Фондацијата Роџер Федерер.

Во согласност со своите јужноафрикански корени, Линет Федерер на ноќната масичка ја чува автобиографијата на Нелсон Мандела - делото што го напишал поранешниот претседател на Јужна Африка и добитник на Нобеловата награда за мир е совршена инспирација со оглед на нејзините филантропски интереси.

Татко – потомок на истакнато швајцарско семејство

Таткото на прочуениот тенисер пораснал во местото Бернек, во кантонот Сент Гален. Роберт Федерер потекнува од семејство што припаѓало на старото швајцарско граѓанство уште од 16 век. Неговите роднини низ историјата заземале значајни позиции во локалната управа и политиката.

Во сродство е со истакнати верски личности, меѓу кои се Урбан Федерер, опат (прелат) на бенедиктинскиот манастир Ајнзиделн, и Хајнрих Федерер, познат католички свештеник и писател. Роџер Федерер бил воспитуван во римокатолички дух и завршил католичко училиште.

Линет и Роберт Федерер, кои се во брак од 1973 година, се запознале преку работа. Во седумдесеттите години од минатиот век работеле во фармацевтската компанија „Ciba-Geigy“ (денес „Novartis“). Нивниот син дури некои од своите први тениски искуства ги стекнал на терените на таа компанија.

Додека Линет и Роберт работеле за „Ciba-Geigy“ во Базел, нивните деца ги минувале викендите играјќи тенис на приватните терени на компанијата. Часовите поминати на терен станале начин на живот за Роџер, уште од неговата трета година.

„Одам. Се гледаме дома“

Откако го докажал својот талент за спорт, Линет го запишала синот во елитната јуниорска програма наречена „Old Boys Tennis Club“, со седиште во Базел. Подоцна станал најдобар јуниор во земјата.

Татко му го учел колку е важна дисциплината. „Играв тенис со тато и секогаш бев многу темпераментен, понекогаш не баш најдобар, а тоа го фрустрираше татко ми“, објасни Федерер во видео за „Nike“ во 2016 година, па додаде: „Затоа стави пет швајцарски франци на клупата покрај мене и рече: Одам. Се гледаме дома“.

Роџер Федерер денес ги фали методите на своите родители и ги применува во воспитувањето на децата што ги доби со сопругата Мирка.

Мајката на славниот тенисер е многу посветена на фондацијата што Роџер ја основал уште во 2003 година, на 22 години, и така ги поддржува образовните проекти во Јужна Африка и Швајцарија, со нагласок на раното образование и соработка со локални и невладини организации.

Таткото на Роџер за Новак Ѓоковиќ

Професионалната кариера на Роџер Федерер траеше цели 24 години, од 1998 до 2022 година. Негови најголеми ривали беа Новак Ѓоковиќ и Рафаел Надал. Се натпреваруваа за најпрестижните трофеи и беше вистинско задоволство да се гледаат на теренот.

За публиката тоа беше уживање, за навивачите често и многу стресно искуство, а за родителите на Роџер Федерер и повеќе од тоа.

„Ѓоковиќ нѝ нанесе повеќе болка отколку Рафа. Особено останува во сеќавање тој Лондон во 2019 година кога Роџер имаше две меч-топки во финалето на Вимблдон на свој сервис. Сите веќе ја видовме титулата во неговите раце“, рече во 2022 година Роберт, пренесува швајцарскиот „Tages-Anzeiger“.

Се присети и на овие турнири: „Тешки моменти беа полуфиналињата на УС Опен во 2010 и 2011 година против Новак. Роџер и тогаш пропушти по две можности да ја заврши работата“.

Да потсетиме, Ѓоковиќ и Федерер одиграа 50 дуели во кариерата, Новак води во победи со 27:23.

Зборовите на таткото на Роџер Федерер многу говорат за тоа колку родителите на тенисерите емотивно ги доживуваат натпреварите, но и докажуваат дека Новак беше непобедлив, многу почесто од Рафа.