Фото: Најлесниот електричен суперавтомобил на светот доаѓа од Индија

Кога станува збор за електрични суперавтомобили, и Индија очигледно има што да понуди. Чанки Вазирани, индиски претприемач кој има искуство во компаниите „Rolls-Royce“ и „Jaguar“, започнал сопствен стартап и создал уникатен автомобил.

Неговиот назив е „Ekonk“, што во превод отприлика би значело „почеток на боженственото светло“ односно „Големата експлозија“.

Како што вели основачот, станува збор за најлесниот батериски електричен суперавтомобил на светот, а воедно и за најбрзото возило некогаш направено во Индија.

„Vazirani Ekonk“ може да се пофали со маса од само 738 кг. и електромотор со моќност од 722 коњски сили, па односот на силата и масата изнесува речиси 1:1.

Она што е посебно за „Ekonk“ е фактот дека од него е исфрлено сè што е „непотребно“. Така, во овој автомобил нема електроника, системи за асистенција на возачот и останати модерни додатоци.

Автомобилот е механичко-електричен колку што може да биде, односно во себе го содржи само она неопходното: погон, суспензија, електромотори и тркала. Важно е да се нагласи дека во него има место само за едно лице – возачот.

Голема заштеда кога станува збор за масата во овој автомобил е остварена со отстранувањето на воденото ладење на батериите. Тие во случајот на „Ekonk“ се ладат со воздух и тоа на иновативен начин. Нивните инженери наводно го проучувале начинот на кој луѓето и животните дишат и ја регулираат телесната температура, па некои од тие принципи се применети и на ладење на батериите исклучиво преку проток на воздухот.

Резултатот е лесен електричен болид кој од 0 до 100 км/ч. би требало да забрзува за околу 2,5 секунди, додека максималната брзина е нешто над 300 км/ч.

Засега сè уште нема никакви информации за цената и почетокот на сериското производство на овој автомобил.