"Nevera R" е незапирлива! Сруши сè пред себе и стана најбрз електричен автомобил во светот

Освен што постигна ново време за 0 – 400 – 0 km/h од 25,79 секунди – дури 2,04 секунди побрзо од претходниот рекордер – "Nevera R" достигна и максимална брзина од 431,45 km/h, со што стана најбрзиот сериски електричен автомобил во светот. Тимот на Римац уште еднаш покажа дека припаѓа на врвот на инженерството и дизајнот, поместувајќи ги границите на можностите. "Nevera R" сега е референтна точка во сите категории на перформанс.

Продолжувајќи ја традицијата на оригиналната "Nevera", која во 2023 година постави 23 рекорди за еден ден на патеката "ATP" во Германија, "Nevera R" успеа да ги надмине сите тие резултати. Во "high-speed" режим, со независна потврда од "Dewesoft", финалниот тест пред испораката на купувачите покажува колкав напредок е постигнат.

Подобрите перформанси се резултат на темелен инженерски редизајн на клучните компоненти. Меѓу новитетите се: нов аеродинамички пакет (15% повеќе потисок, 10% подобра ефикасност), нови "Michelin Cup 2" гуми (10% помалку подуправување, 5% подобро прилепување), нова генерација батериски систем "Rimac Technology" од 108 kWh и напреден погон на сите тркала кој 100 пати во секунда ја прилагодува испораката на моќноста поединечно за секое тркало. "Nevera R" има 2.107 коњски сили преку четири електромотори, овозможувајќи екстремни перформанси без да се жртвува секојдневната практичност.

Произведена во само 40 примероци, со почетна цена од 2,3 милиони евра, "Nevera R" ја носи титулата најбрз и најразновиден електричен хиперавтомобил на денешницата.

„Кога првпат ја претставивме "Nevera", изгледаше како да го достигнавме врвот на перформансите кај хиперавтомобилите. Во само една генерација направивме скок кој инаку би барал децении. Но сега, благодарение на непрекината иновација, "Nevera R" оди уште побрзо, задржувајќи ја комфорноста и практичноста што ја прави "Nevera" секојдневно употреблива. Рекордите се во нашето ДНК – и тука нема да застанеме“, изјави Мате Римац, основач на "Rimac Group".

Некои од новите рекорди на "Nevera R" вклучуваат:

• 0 – 60 mph: 1,66 с (подобрување од 0,08 с)

• 0 – 100 km/h: 1,72 с (подобрување од 0,09 с)

• 0 – 100 mph: 2,96 с (подобрување од 0,25 с)

• 0 – 200 km/h: 3,95 с (подобрување од 0,47 с)

• 0 – 300 km/h: 7,89 с (подобрување од 1,33 с)

• 0 – 200 mph: 9,25 с (подобрување од 1,61 с)

• 0 – 400 km/h: 17,35 с (подобрување од 3,96 с)

• 100 – 200 km/h: 2,22 с (подобрување од 0,37 с)

• 200 – 250 km/h: 1,65 с (подобрување од 0,35 с)

• 200 – 300 km/h: 3,89 с (подобрување од 0,9 с)

• 0 – 100 – 0 km/h: 3,32 с (подобрување од 0,67 с)

• 0 – 200 – 0 km/h: 8,58 с (подобрување од 0,27 с)

• 0 – 300 – 0 km/h: 14,49 с (подобрување од 1,19 с)

• 0 – 400 – 0 km/h: 25,79 с (подобрување од 4,14 с)

• 0 – 250 – 0 mph: 26,20 с (подобрување од 5,21 с)

• Четврт милја: 7,90 с (подобрување од 0,35 с)

• Милја од место: 19,71 с (подобрување од 0,88 с)

• Максимална брзина: 431,45 km/h (268,2 mph)