Електричните возила се развиваат со брзо темпо, но во Бразил нивниот развој не е диктиран само од еколошки причини.

Во земја каде криминалот и кражбите на автомобили се секојдневие, побарувачката за блиндирани возила расте од ден на ден. Толку многу што Бразил денес има најголема цивилна флота на блиндирани возила во светот.

Дури и „Toyota“ нуди фабрички блиндирани верзии на моделите „Corolla“ и „Hilux“.

А сега, еден од најбрзо растечките кинески брендови за електрични возила (EV) се вклучува во играта – и тоа целосно блиндиран.

„Zeekr“ е релативно нов играч на сцената на електрични возила, но брзо се наметна како еден од најинтересните нови производители на автомобили од Кина.

Освен што бележи раст на продажбата на домашниот пазар, „Zeekr“ забрзано се шири низ целиот свет – вклучително и во Јужна Америка, каде неодамна е фотографиран многу интересен примерок од нивниот модел „001“ на улиците.

Електричен караван со балистичка заштита

Станува збор за првиот блиндиран примерок на моделот „Zeekr 001“. Неодамна е забележан во Бразил, целосно затемнет, но однадвор изгледа како обичен „001“.

Сепак, сите панели на возилото се блиндирани, стаклата се отпорни на куршуми, а панорамскиот стаклен покрив е дополнително зајакнат.

Иако не е познато која фирма ја извршила конверзијата, јасно е дека сопственикот на ова возило мора да е многу важна личност, штом решил да се вози во електричен автомобил со балистичка заштита. Фотографии од подвозјето сè уште не се достапни, но се претпоставува дека и пакетот батерии е дополнително заштитен за да издржи евентуални експлозии одоздола.

Под оклопот: брутални перформанси на електрично возило

„Zeekr 001“ користи електрична архитектура од 800 волти, со избор помеѓу "LFP" батерија од 95 "kWh" и "NMC" пакет од 100 kWh.

Основните модели располагаат со 416 коњски сили на задните тркала, додека верзиите со погон на сите тркала имаат дополнителен електромотор напред со моќност од 362 коњски сили.

Највисоката верзија, „001 FR“, ги подигнува работите на сосема ново ниво: 1.248 коњски сили и 1.280 Nm вртежен момент овозможуваат забрзување до 100 км/ч за само 2,07 секунди!

И додека повеќето луѓе го купуваат овој модел поради изгледот и перформансите, некој во Бразил сега го користи и како лично електрично блиндирано возило, докажувајќи дека иднината на електричната мобилност воопшто не мора да биде кревка.