Властите најавија дека во наредните две недели ќе бидат отстранети сите камери за автоматско следење на брзината, нарекувајќи ги застарен „начин за извлекување пари“. Наместо тоа, се најавува нов пристап кон безбедноста во сообраќајот.

Со години, малите сиви кутии покрај училиштата и прометните улици предизвикуваа мешавина од гнев и рамнодушност. Некои возачи сметаа дека камерите ја вршат својата работа – го забавуваат сообраќајот, ги фаќаат пребрзите возачи и генерално ги прават патиштата побезбедни без потреба од дополнително полициско присуство, пишува „CarScoops“.

Од каде ненадејната промена?

Сепак, критичарите на системот тврдеа дека камерите повеќе служат за полнење на буџетот отколку за зголемување на безбедноста, а владата токму на тоа тврдење го заснова својот аргумент.

Премиерот на Онтарио, Даг Форд, ги нарече камерите „начин за полнење на касата“, тврдејќи дека тие малку придонесуваат за намалување на брзината и само ги оптоваруваат возачите со казни кои пристигнуваат со големо задоцнување.

Минатиот четврток парламентот изгласа закон со кој се забранува употребата на камерите и се наложува нивно отстранување од патиштата во рок од две недели, по низа вандалски напади врз овие уреди.

Нивното место ќе го заземат „физички мерки“ за намалување на брзината, вклучувајќи „лежечки полицајци“, кружни текови и знаци со трепкачки светла, иако министерот за сообраќај Прабмит Сакрарија сè уште нема прецизиран временски рок за нивното поставување.

Таквата инфраструктура чини, наместо да носи приход, а премиерот Форд тврди дека неговата администрација ќе основа фонд кој ќе им помогне на општините да ги финансираат новите мерки. Сепак, засега не откри колкава ќе биде сумата ниту од кои извори ќе се обезбедат средствата.

Според извештајот на „CBC“, законот за забрана на камерите бил дел од поширок пакет за намалување на бирократијата, што значи дека бил изгласан без подолги расправи и јавни консултации.

Загриженост поради безбедносниот јаз

Додека многу возачи ќе го поздрават овој потег со одушевување, не се сите задоволни. Многумина веруваат дека камерите навистина придонесуваат за намалување на бројот на несреќи – што го потврдуваат бројни истражувања.

Други изразуваат загриженост поради временскиот јаз меѓу отстранувањето на камерите и примената на новите сообраќајни мерки.

„Постојат многу начини да се забави сообраќајот“, изјави лидерката на „NDP“ Марит Стајлс за „CBC“.

„Но ако барем еден пешак, едно дете, биде повредено во тој период, одговорноста ќе биде исклучиво на грбот на премиерот“.