Трошоците за живот кај нас постојано растат, но во некои земји се изненадувачки ниски – постојат убави места ширум светот каде што може сосема пристојно да се живее со помалку од 500 евра месечно. Уредниците на порталот „World Wild Schooling“ избраа 12 дестинации кои се привлечни, достапни и полни со активности, а не ви требаат повеќе пари од тоа.

Сончев Брег, Бугарија

Листата започнува со достапна дестинација која нуди сонце, море, песок и забава. Сончев Брег одамна е најпознатото приморско летувалиште во Бугарија, а денес е актуелно и поради ниските цени. Во Сончев Брег, наводно, може да се најдат станови на одлична локација за помалку од 150 евра месечно, вклучувајќи пристап до базен.

Варна, Бугарија

Варна е прекрасен пристанишен град на северот, познат по своите приморски одморалишта, златно-песочни плажи и шармантниот центар на градот со опуштена атмосфера. Месечните трошоци за храна во Варна во просек изнесуваат околу 270 евра, а понудата на станови за изнајмување е доволно широка за да можете да се „вклопите“ во буџет до 500 евра.

Катманду, Непал

Катманду е едно од најевтините места за живеење во светот. Се вели дека една личност може да живее во градот за околу 455 долари месечно (околу 390 евра), вклучувајќи кирија, комунални услуги, храна и превоз. Окружен со Хималаите, Катманду е врвна дестинација за планинарење и качување, но и самиот град е спектакуларен — познат по богатата култура, фасцинантните храмови и живописните плоштади.

Пај, Тајланд

Уште едно одлично место за живеење ако ја сакате природата е Пај, сликовит град во провинцијата Мае Хонг Сон на северот на Тајланд. Се наоѓа во бујна долина покрај реката Пај, со жив централен дел, опуштачки топли извори и прекрасни водопади. Може да ги задржите трошоците под 500 евра месечно во Пај, резервирајќи „Airbnb“ за помалку од 300 евра и готвејќи си дома.

Мириса, Шри Ланка

Мириса е мал крајбрежен град во јужниот дел на Шри Ланка. Најпозната е по тиркизните води, неверојатниот морски свет и живописните улици опкружени со палми. Просечните месечни трошоци за живот во градот се околу 430 евра, а таа сума може дополнително да се намали доколку се пронајде поевтино сместување.

Куско, Перу

Во Куско, поранешната престолнина на Царството на Инките, можете да најдете станови за помалку од 250 евра месечно и соби во пансиони за околу 170 евра месечно, што ви остава сосема доволно средства за сите останати трошоци. Освен што е неверојатно достапен, Куско е без сомнение еден од најубавите градови во светот — сместен на 3.399 метри надморска височина и опкружен со планинскиот венец на Андите. Градот нуди уникатна мешавина од богата историја, авантури на отворено и вкусна кујна.

Бали, Индонезија

Бали не е најголемиот остров во Индонезија, но без сомнение е најпопуларниот. Тоа е дом на бујни оризови тераси, импресивни вулкански пејзажи, шармантни уметнички градчиња и живописни крајбрежни одморалишта. Исто така, на Бали може удобно да се живее и да се доживее сè што островот нуди за помалку од 500 долари (околу 426 евра). Вистина, нема да можете да престојувате во луксузни вили и да јадете во ресторани со пет ѕвезди, но пристапните пансиони и евтината улична храна нудат дури и поавтентично и уникатно искуство.

Маракеш, Мароко

Црвениот Маракеш, средновековен град во Мароко, е најпознат по својата жешка клима, богата историја и шаренолики пазари. Соби и станови во градот се достапни за 250 евра или помалку, па патниците со ограничен буџет нема да имаат проблем да ги задржат вкупните трошоци под 500 евра.

Влора, Албанија

Генерално гледано, приморските градови во Европа се скапи. Сепак, Албанија нуди поевтина алтернатива и ако сте паметни со парите, можете солидно да живеете со 500 евра месечно. Влора е шармантен албански приморски град кој на патниците им нуди недопрени плажи, кристално чиста тиркизна вода и зелени падини идеални за планинарење. Потребно е само да најдете достапно сместување на „Airbnb“, максимално да ги искористите бесплатните атракции и да избегнувате јадење во ресторани, особено во туристичката сезона.

Саранда, Албанија

Уште една достапна крајбрежна дестинација во Албанија е Саранда. Ова прекрасно летувалиште им нуди на посетителите долги сончеви денови, плажи како од разгледница и прекрасен пејзаж. Во градот може да се најдат станови за околу 250 евра месечно, вклучувајќи комунални услуги, што ви остава доволно средства за останатите трошоци.

Гоа, Индија

Според податоците на компанијата „Living Cost“, една личност може да живее во Гоа, крајбрежна држава во западна Индија, за само 455 долари месечно, вклучувајќи кирија, комунални услуги и храна. Тоа е помалку од 400 евра за уживање на прекрасните плажи и во богатата култура. Некогашна португалска колонија, Гоа има фасцинантна мешавина на индиски и португалски шарм, што е очигледно во кујната и архитектурата.

Лангкави, Малаезија

Лангкави е најголемиот од 99-те острови во архипелагот Лангкави, покрај малезискиот копнен дел. Овој магичен тропски остров е омилена дестинација за бекпекери и иселеници кои бараат ниски трошоци за живот и сликовит островски начин на живеење. На островот можете удобно да живеете за околу 420 евра месечно. Кога не уживате на некоја од многуте плажи или не прошетувате до живописен водопад, ќе уживате во локалната малезиска кујна.